ఇటలీలో సరికొత్త సాంకేతికత సాయంతో థర్మల్ స్క్రీనింగ్ నిర్వహిస్తున్నారు. రోమ్లోని ఫ్యూమిసినో విమానాశ్రయంలో స్మార్ట్ హెల్మెట్తో శరీర ఉష్ణోగ్రతలను పరీక్షిస్తున్నారు. ప్రయాణికులు కదులుతున్నప్పుడే వారి ఉష్ణోగ్రత వివరాలను ఈ అధునాతన పరికరం ద్వారా తెలుసుకోవచ్చు.
భద్రతా సిబ్బంది ఈ పరికరాన్ని ధరించి ఏడు మీటర్ల పరిధిలో ఉన్న వారి శరీర ఉష్ణాన్ని స్మార్ట్ హెల్మెట్ స్క్రీన్పై చూడవచ్చు. ప్రయాణికుల ఇన్ఫ్రాడెడ్ ఇమేజ్తో పాటు వారి ఉష్ణోగ్రతను కుడి కన్ను ద్వారా చూపిస్తుంది. ఎడమ కన్ను ద్వారా సాధారణ దృశ్యం కనిపిస్తుంది.
ఇటలీలోనే ఫస్ట్
ఐరోపాలో ఇటువంటి పరికరం ఉపయోగిస్తున్న తొలి విమానాశ్రయం ఇదేనని స్మార్ట్ హెల్మెట్ పనితీరును పరిశీలిస్తున్న ఎయిర్పోర్ట్ ఇంఛార్జ్ సిమోన్లుకా టిబెరియా తెలిపారు. ప్రయాణ ఆంక్షలు సడలించిన తర్వాత ప్రజలకు సురక్షితంగా ఉంటారన్న భరోసా ఇవ్వడానికి ఇలాంటి అత్యున్నత సాంకేతికత పరికరాలు ఉపయోగపడతాయని అన్నారు.
వచ్చే నెల నుంచి రద్దీ
అధికారికంగా లియోనార్డో డా విన్సీ అంతర్జాతీయ విమానాశ్రయంగా పిలిచే ఈ ఫ్యూమిసినో ఎయిర్పోర్ట్ నుంచి ఇటలీ సహా ఐరోపాలోని పలు ప్రాంతాలకు విమానాలు నడుస్తాయి. ప్రస్తుతం కొద్ది సంఖ్యలోనే విమానాలు నడుస్తున్నప్పటికీ.. వచ్చే నెల నుంచి రద్దీ పెరిగే అవకాశం ఉందని అధికారులు భావిస్తున్నారు.
