కరోనాకు రష్యా రెండో వ్యాక్సిన్ రెడీ

రెండో కొవిడ్​ వ్యాక్సిన్​కు అనుమతులు ఇచ్చింది రష్యా. వైరస్ నుంచి కాపాడే ప్రతిరోధకాలు వలంటీర్లలో ఉత్పత్తి అయినట్లు శాస్త్రవేత్తలు తెలిపారు. టీకా వల్ల రోగనిరోధక శక్తి ఆరు నెలల వరకు ఉంటుందని వెల్లడించారు. నవంబర్​లో అడ్వాన్స్​డ్ ట్రయల్స్ జరగనున్నట్లు చెప్పారు.

కరోనాకు మరో వ్యాక్సిన్​ను తీసుకొచ్చింది రష్యా. ఇదివరకే స్పుత్నిక్​ టీకాను మార్కెట్​లోకి విడుదల చేయగా.. తాజాగా.. సైబీరియాలోని వెక్టార్ ఇన్​స్టిట్యూట్ అభివృద్ధి చేసిన 'ఎపివాక్​కరోనా' వ్యాక్సిన్​కు అనుమతులు లభించాయి. ఈ విషయాన్ని రష్యా అధ్యక్షుడు వ్లాదిమిర్ పుతిన్ బుధవారం ప్రకటించారు.

ఈ వ్యాక్సిన్​ను 18 నుంచి 60 ఏళ్ల మధ్య వయసు ఉన్న100 మంది వలంటీర్లపై ప్రయోగించారు. రెండు నెలల పాటు సాగిన ఈ ట్రయల్స్... రెండు వారాల క్రితం ముగిశాయి. ఈ అధ్యయన ఫలితాలను శాస్త్రవేత్తలు ఇంకా బయటికి వెల్లడించలేదు.

అయితే వ్యాక్సిన్ వల్ల సానుకూల ఫలితాలు వచ్చాయని టీకా అభివృద్ధిలో పాల్గొన్న శాస్త్రవేత్తలు పేర్కొన్నారు. వైరస్ నుంచి రక్షించేందుకు అవసరమైన యాంటీబాడీలు ఉత్పత్తి అయినట్లు చెప్పారు. వ్యాక్సిన్ వల్ల ఏర్పడిన రోగనిరోధక శక్తి ఆరు నెలల వరకు ఉంటుందని చెప్పుకొచ్చారు.

మరిన్ని ట్రయల్స్..

వ్యాక్సిన్ భద్రత, సమర్థతను అంచనా వేసే అధునాతన ట్రయల్స్​ను నవంబర్ లేదా డిసెంబర్​లో ప్రారంభించనున్నారు. అప్పటివరకు ఈ టీకాను పూర్తి స్థాయిలో ఉపయోగిస్తారా అనే విషయంపై స్పష్టత లేదు. అడ్వాన్స్​డ్ ట్రయల్స్​లో భాగంగా 40 వేల మందిపై ప్రయోగాలు చేయనున్నట్లు రష్యా ఉప ప్రధాని టాట్యానా గొలికోవా తెలిపారు. ముందస్తు ట్రయల్స్​లో వలంటీర్​గా పాల్గొన్నారు టాట్యానా.

ఇవీ చదవండి