బ్రిటన్లో అతిపెద్ద కొవిడ్-19 వ్యాక్సిన్ అభివృద్ధి ప్రాజెక్టును చేపడుతోంది ప్రముఖ ఆక్స్ఫర్డ్ యూనివర్సిటీ. వ్యాక్సిన్ ట్రయల్స్లో భాగంగా కోతులపై జరిపిన పరిశోధనలో ఆశాజనక ఫలితాలు సాధించినట్లు విశ్వవిద్యాలయ శాస్త్రజ్ఞులు తెలిపారు. వ్యాక్సిన్ను ప్రయోగించిన కోతుల్లో రోగనిరోధక వ్యవస్థ కరోనాను నిలువరించినట్లు గుర్తించారు. అంతేకాకుండా ఎలాంటి దుష్ప్రభావాలు లేవని తేల్చారు.
ఈ అధ్యయానాన్ని ఇంకా పూర్తి స్థాయిలో సమీక్షించాల్సి ఉంది. ఒక్క డోసుతోనే కోతుల్లో ఊపిరితిత్తుల నష్టం జరగకుండా నిరోధించడం సహా ఇతర అవయవాలపైనా వైరస్ ప్రభావం ఏ మాత్రం పడకుండా నిలువరించినట్లు పరిశోధకులు చెబుతున్నారు. కరోనా వైరస్ తీవ్రంగా ఉన్న ఆరు కోతులకు వ్యాక్సిన్ ఇచ్చిన అనంతరం నిమోనియా బారినపడలేదని, హానికర లక్షణాలను గుర్తించలేదని పరిశోధకులు వివరించారు.
బ్రిటన్లో మానవులపై జరుగుతున్న వ్యాక్సిన్ ప్రయోగం ఇంకా తుది దశకు చేరుకోనప్పటికీ ఇప్పుడు సాధించిన పురోగతి స్వాగతించదగినదని నిపుణులు అభిప్రాయపడుతున్నారు. అయితే మనుషులపై ఈ వ్యాక్సిన్ ఏ మేర ప్రభావం చూపుతుందో పరిశీలించాల్సి ఉందని స్పష్టం చేశారు. తుది ఫలితాల కోసం ఉత్కంఠగా ఎదురుచూస్తున్నట్లు చెప్పారు.
మానవుల్లోనూ ప్రభావం...
మానువుల్లోనూ ఈ వ్యాక్సిన్ కచ్చితంగా ప్రభావం చూపుతుందని విశ్వాసంతో ఉన్నట్లు చెబుతున్నారు పరిశోధనకు నేతృత్వం వహిస్తున్న ఆక్స్ఫర్డ్ యూనివర్సిటీ ఫ్రొఫెసర్ సారా గిల్బర్ట్. అనేక మందిపై ట్రయల్స్ నిర్వహించాల్సి ఉందన్నారు.
ఈ ప్రాజెక్టులో ఆక్స్ఫర్డ్ యూనివర్సిటీతో భాగస్వామ్యం వహిస్తోంది బ్రిటన్ ప్రఖ్యాత డ్రగ్స్ సంస్థ ఆస్ట్రాజినికా. ట్రయల్స్ విజయవంతమైతే ఈ ఏడాది చివరి నాటికి 100 మిలియన్ల డోసులను సిద్ధం చేస్తామని తెలిపింది.
మానవులపై ట్రయల్స్ విజయవంతమైతే కెన్యా మెడికల్ రీసెర్చ్ సంస్థను సంప్రదించి ఆ దేశంలో పరీక్షించేందుకు అనుమతి పొందుతామన్నారు పరిశోధకులు.
బ్రిటన్ ఆరోగ్య కార్యకర్తలపై నిర్వహించిన వ్యాక్సిన్ ట్రయల్స్ ఫలితాలు వచ్చే నెలలో రానున్నాయి. అప్పుడే వ్యాక్సిన్ పురోగతిపై ఓ అంచనాకు వచ్చే వీలుంది.
