ప్రపంచవ్యాప్తంగా విజృంభిస్తోన్న కరోనాకు వ్యాక్సిన్ అభివృద్ధి చేసే క్రమంలో.. బ్రిటన్ కీలక ప్రకటన చేసింది. కొవిడ్పై పోరులో కీలకంగా ఉపయోగపడే పరిశోధన కేంద్రం ఏర్పాటుకు దాదాపు రూ.854 కోట్లు కేటాయించింది. ఈ విషయాన్ని భారత సంతతి బ్రిటన్ వాణిజ్యశాఖ మంత్రి అలోక్ శర్మ ప్రకటించారు.
ఈ వ్యాక్సిన్ తయారీ, ఆవిష్కరణ కేంద్రం (వీఎంఐసీ) పూర్తయితే.. బ్రిటన్లోని జనాభాకు ఆరు నెలల్లోగా టీకాను అందించేలా మార్గం సుగమం అవుతుందని తెలిపారు. నిర్దేశించిన సమయం కంటే 12 నెలల ముందే.. వచ్చే ఏడాది ప్రథమార్ధంలో కేంద్రం ప్రారంభమయ్యేందుకు ఈ నిధులు సమకూర్చినట్లు అలోక్ వెల్లడించారు. అంతే కాకుండా, వ్యాధి నిర్ధరణ సామర్థ్యాన్ని పెంచేలా.. దాదాపు మరో రూ.348 కోట్ల పెట్టుబడికి ప్రభుత్వం సిద్ధంగా ఉందని పేర్కొన్నారు.
"ప్రస్తుతం తాత్కాలిక సదుపాయాలతో ఉన్న వ్యాక్సిన్ తయారీ కేంద్రాన్ని వీలైనంత త్వరగా నిర్మించి పూర్తి చేస్తాం. వ్యాక్సిన్ ప్రయోగాన్ని ఆవిష్కరణ నుంచి పంపిణీ వరకు తీసురావాలన్నదే బ్రిటన్ లక్ష్యం".
అలోక్ శర్మ, బ్రిటన్ వాణిజ్యశాఖ మంత్రి
భవిష్యత్తులో ఎలాంటి వైరస్ వ్యాపించినా.. బ్రిటన్కు దీర్ఘకాలిక భరోసా కలిగించేలా ఈ కేంద్రం ఉపయోగపడుతుందని అలోక్ తెలిపారు. నిధుల కేటాయింపుపై వ్యాక్సిన్ తయారీ కేంద్ర ముఖ్య కార్యనిర్వహక అధికారి డాక్టర్.మాథ్యూ డచర్స్ హర్షం వ్యక్తం చేశారు.
"ఈ నిధులతో నిర్మాణ పనులు వేగవంతమవుతాయి. సంవత్సరంలోగా కేంద్రంలో కార్యకలాపాలు ప్రారంభమయ్యేందుకు సాయపడుతుంది. సామర్థ్యం గణనీయంగా పెరుగుతుంది. తద్వారా బ్రిటన్లోని ప్రతి ఒక్కరికీ కొన్ని నెలల్లోనే తగినంత టీకా తయారు చేయవచ్చు.
మాథ్యూ డచర్స్, వ్యాక్సిన్ తయారీ కేంద్ర చీఫ్ ఎగ్జిక్యూటివ్
కరోనా లాంటి వైరస్ సమస్యలకు ధీటుగా బదులివ్వడానికి.. బ్రిటన్కు ఈ తయారీ కేంద్రం ఓ ఆయుధంలా పనిచేస్తుందని బ్రిటన్ రీసెర్చ్ అండ్ ఇన్నోవేషన్(యూకేఆర్ఐ) చీఫ్ ఎగ్జిక్యూటివ్ మార్క్ వాల్పోర్ట్ అభిప్రాయపడ్డారు. ప్రపంచవ్యాప్తంగా ఇప్పటివరకు 3 లక్షల మందికి పైగా వైరస్కు బలయ్యారు. 40 లక్షలకు పైగా వైరస్ కేసులు నిర్ధరణ అయ్యాయి.
