అఫ్గానిస్థాన్లో మానవతా సంక్షోభాన్ని (Afghan crisis) పరిష్కరించేందుకు అంతర్జాతీయ సమాజం ముందుకొచ్చింది. ఇందుకోసం 1.2 బిలియన్ డాలర్ల (సుమారు రూ.8,833 కోట్లు) సాయాన్ని ప్రకటించింది.
అఫ్గాన్ పరిస్థితులపై జెనీవాలో సోమవారం ఐరాస (United Nations) నిర్వహించిన అత్యున్నత స్థాయి సమావేశంలో (Afghanistan UN meeting) ఈ మేరకు ఆర్థిక సహాయం గురించి సభ్య దేశాలు చర్చించాయి. ఈ ఏడాది చివరి వరకు ముఖ్యమైన సహాయక చర్యలు (Afghan assistance program) కొనసాగాలంటే.. 606 మిలియన్ డాలర్లు కావాలని సమావేశంలో ఐరాస పేర్కొంది. అయితే, సభ్యదేశాలు ఏకంగా 1.2 బిలియన్ డాలర్లు ప్రకటించాయని ఐరాస అత్యవసర సహాయక విభాగం కోఆర్డినేటర్ మార్టిన్ గ్రిఫిత్స్ పేర్కొన్నారు. ఈ నిధులు అఫ్గాన్ ప్రజలకు జీవన రేఖగా మారతాయని అన్నారు. అయితే, ఇంతటితో అంతా అయిపోయినట్లు కాదని, అఫ్గాన్ కష్టాలు తీరిపోలేదని చెప్పారు.
'తాలిబన్లతో చర్చించాల్సిందే'
జెనీవాలో జరిగిన సమావేశం అంచనాలకు మించి ఫలితాలను రాబట్టిందని ఐరాస ప్రధాన కార్యదర్శి ఆంటోనియో గుటెరస్ (Antonio Guterres) పేర్కొన్నారు. మరోవైపు, తాలిబన్లతో (talks with Taliban) సంప్రదింపులు కొనసాగించాల్సిన అవసరం ఉందన్నారు.
"ఐరాస చేసిన అత్యవసర విజ్ఞప్తికి స్పందనగా సభ్య దేశాలు వంద కోట్ల డాలర్లకు పైగా సహాయాన్ని ప్రకటించాయి. అఫ్గాన్ ప్రజల పట్ల అంతర్జాతీయ సమాజానికి ఉన్న నిబద్ధతను ఇది సూచిస్తోంది. అఫ్గాన్లో సహాయ కార్యక్రమాలను కొనసాగించాలంటే.. ఆ దేశంలోని వాస్తవ అధికార యంత్రాంగంతో సంప్రదింపులు చేయక తప్పదు. ఉగ్రవాదమైనా, మానవహక్కులైనా, మాదకద్రవ్యాలైనా.. అంతర్జాతీయ సమాజానికి ఉన్న అన్ని ఆందోళనల విషయంలో తాలిబన్లతో సంప్రదింపులు కొనసాగించాలి."
-ఆంటోనియో గుటెరస్, ఐరాస చీఫ్
అఫ్గాన్లో తాలిబన్ల ఆక్రమణ తర్వాత తలెత్తిన పరిస్థితులపై ఆందోళన వ్యక్తం చేశారు గుటెరస్. ఈ పరిస్థితుల్లో ఐరాస అక్కడ ఉండాల్సిన అవసరం ఉందని చెప్పారు.
ఇదీ చదవండి:
