కరోనా ప్రభావం శస్త్రచికిత్సలపై పడింది. ఈ మహమ్మారి కారణంగా ప్రపంచవ్యాప్తంగా 2.8 కోట్ల సర్జరీలు నిలిచిపోయే అవకాశం ఉందని ఓ అధ్యయనం తెలిపింది. ఫలితంగా వైద్యం కోసం రోగులు సుదీర్ఘ సమయం ఎదురు చూడాల్సి పరిస్థితి ఏర్పడిందన్నారు.
శస్త్రచికిత్సలపై కరోనా ప్రభావాన్ని విశ్లేషించేందుకు.. 120 దేశాల భాగస్వమ్యంతో 'కొవిడ్సర్జ్' అనే సహకార విభాగం ఏర్పాటైంది. 'బర్మింగ్హమ్ విశ్వవిద్యాలయానికి' చెందిన పరిశోధకులు ఈ అధ్యయనానికి నేతృత్వం వహించారు. 71 దేశాల్లోని 359 ఆసుపత్రుల నుంచి శస్త్రచికిత్సల రద్దుపై సమగ్ర సమాచారాన్ని సేకరించారు. మహమ్మారి పరిస్థితుల కారణంగా ఆసుపత్రి సేవలకు 12 వారాలు అంతరాయం ఏర్పడగా.. ఈ పరిణామాలు చోటుచేసుకునే అవకాశం ఉన్నట్లు తెలిపారు.
వారంలో 24 లక్షలు రద్దు...
ఆసుపత్రులకు అంతరాయం కలుగుతున్న ప్రతి అదనపు వారానికి.. మరో 24 లక్షల సర్జరీలు రద్దయ్యే అవకాశం ఉందని 'బ్రిటన్ జర్నల్ ఆఫ్ సర్జరీ'లో ప్రచురితమైన అధ్యయనం పేర్కొంది. ప్రపంచవ్యాప్తంగా ఖరారైన 72.3 శాతం శస్త్రచికిత్సలు రద్దవుతాయని పరిశోధకులు అంచనా వేశారు.
కరోనా వ్యాప్తి నేపథ్యంలో రోగులకు వైరస్ సోకే ప్రమాదం ఉన్నందున ప్రస్తుతం సిద్ధంగా ఉన్న సర్జరీలు రద్దు చేయవచ్చు. ఈ వైరస్ బారిన పడ్డ వారికి సాయమందించి.. మద్దతుగా నిలిచేందుకూ ఆసుపత్రులు ఉపయోగించనున్నారు.
బర్మింగ్హమ్ విశ్వవిద్యాలయం
కీళ్ల వ్యాధుల చికిత్సల పైనా కరోనా ప్రభావం పడింది. 12 వారాల వ్యవధిలో ప్రపంచవ్యాప్తంగా 63 లక్షల ఆర్థోపెడిక్ శస్త్రచికిత్సలు రద్దు చేసే అవకాశం ఉన్నట్లు పరిశోధకులు తెలిపారు. అంతేకాకుండా 23 లక్షల క్యాన్సర్ చికిత్సలూ నిలిచిపోనున్నట్లు అంచనా వేశారు.
ఆలస్యమైతే మరణాలు తప్పవు..
ప్రస్తుతం సర్జరీలు ఆపే నిర్ణయం తప్పనిసరి అయినప్పటికీ.. రోగులపై తీవ్ర ప్రభావం చూపిస్తుందని పరిశోధకులు భావిస్తున్నారు. తిరిగి శస్త్రచికిత్సకు ఏర్పాటు చేసినా.. తర్వాతి షెడ్యూల్ సమయానికి వారి ఆరోగ్య పరిస్థితి క్షీణించే అవకాశం ఉందని హెచ్చరిస్తున్నారు. క్యాన్సర్ తదితర సర్జరీలు ఆలస్యమయ్యే కొద్దీ మరణాలకు దారి తీసే ప్రమాదం ఉన్నందున.. ఆసుపత్రులు క్రమం తప్పకుండా పరిస్థితిని అంచనా వేస్తుండాలని ప్రభుత్వాలకు సూచించారు.
