బ్రెజిల్ ప్రథమ మహిళ మిషెల్ బోల్సోనారో అవినీతి కుంభకోణంపై ప్రశ్నించిన ఓ విలేకరిపై ఆ దేశ అధ్యక్షుడు జైర్ బోల్సోనారో మండిపడ్డారు. పలుమార్లు ఈ అంశంపై ప్రశ్నించగా సహనం కోల్పోయిన ఆయన.. నిన్ను చితకబాదాలని ఉంది అంటూ ఆగ్రహం వ్యక్తం చేశారు.
బ్రెసీలియాలోని మెట్రోపాలిటన్ క్యాథడ్రల్ సందర్శనకు వచ్చిన సమయంలో ఓ విలేకరి అధ్యక్షుడ్ని కలిశారు. ఈ సందర్భంగా మిషెల్ కుంభకోణంపై ప్రశ్నించగా.. 'నీ మూతిపై పిడిగుద్దులు కురిపించాలని ఉంది' అంటూ ధ్వజమెత్తారు.
విలేకరిని బెదిరించటంపై అక్కడున్న మిగతా పాత్రికేయులు ఆందోళన చేపట్టారు. దాంతో మారుమాట్లాడకుండా అక్కడినుంచి వెల్లిపోయారు బోల్సోనారో.
కుంభకోణంపై..
సెనేటర్గా పనిచేస్తున్న అధ్యక్షుడి మిత్రుడు, మాజీ పోలీసు అధికారి ఫ్యాబ్రీసియో కిరోజ్తో కలిసి ప్రథమ మహిళ ఉద్యోగుల జీతాల కుంభకోణానికి పాల్పడ్డారంటూ.. అక్కడి పత్రికల్లో కథనాలు వచ్చాయి. అధ్యక్షుడి కుమారుడు ఫ్లేవియో బోల్సోనారో రియో డి జనీరోలో 2011-2016 వరకు శాసనసభ్యుడిగా పనిచేసినప్పుడు ఈ కుంభకోణం జరిగినట్లు పత్రిక పేర్కొంది. ఆ సమయంలో నిధులను కిరోజ్.. ప్రథమ పౌరురాలి బ్యాంకు ఖాతాలకు మళ్లించినట్లు తెలిపింది. ప్రస్తుతం కిరోజ్, ప్లేవియోను ప్రభుత్వం విచారిస్తోంది.
అయితే.. ఈ కుంభకోణంపై మిషెల్ మౌనంగా ఉన్నారు.
ఇదీ చూడండి: 'ఇంకా ఎక్కువ మందినే కాల్చాలనుకున్నా!'
