భారత్లో 86శాతం మంది.. రష్యా అభివృద్ధి చేసిన 'స్పుత్నిక్-వీ' కొవిడ్ టీకాను తీసుకునేందుకు సిద్ధంగా ఉన్నట్లు ఓ సర్వే చెబుతోంది. బ్రిటన్కు చెందిన యుగోవ్ అనే.. మార్కెట్ రీసెర్చ్ అండ్ డేటా అనలిటిక్స్ సంస్థ ఈ సర్వే నిర్వహించింది. కరోనా వైరస్ను ఎదుర్కోవడానికి వ్యాక్సినేషన్ చేయించుకునేందుకు చాలా మంది ఆసక్తి చూపుతున్నట్లు తెలిపింది.
భారత్ సహా 11 దేశాల్లో ఈ సంస్థ సర్వే చేపట్టింది. బ్రెజిల్, ఈజిప్ట్, ఇండోనేసియా, మలేసియా, మెక్సికో, నైజీరియా, సౌదీ అరేబియా, ఫిలిప్పీన్స్, యూఏఈ, వియత్నాం దేశాల్లో సర్వే జరిగింది. అక్టోబర్ 9 నుంచి 15వ తేదీ మధ్య ఈ సర్వే చేపట్టారు. మొత్తం 12,000 మందిలో 73 శాతం మంది రష్యా టీకా తీసుకునేందుకు సంసిద్ధంగా ఉన్నట్లు సర్వే ఫలితాలు చెబుతున్నాయి. వ్యాక్సిన్ విషయంలో మధ్య, దక్షిణాసియా దేశాలపై చేపట్టిన సర్వేల్లో ఇదే అతిపెద్దది.
సర్వేలో అధికంగా 96 శాతం.. వియత్నాంకు చెందిన ప్రజలు 'స్పుత్నిక్ వీ' వ్యాక్సిన్ కోసం సిద్ధంగా ఉన్నట్లు సర్వే తెలిపింది. తర్వాత బ్రెజిల్(89%), భారత్(86%), మలేసియా(89%) దేశాలు నిలిచాయి. రష్యన్ ప్రత్యక్ష పెట్టుబడి నిధి(ఆర్డీఐఎఫ్) , రష్యా సౌభ్రాతృత్వ నిధి సంస్థల ఆధ్వర్యంలో ఈ సర్వే జరిగింది. నమ్మకం, భద్రత, సమర్థత ఆధారంగా తమ 'స్పుత్నిక్- వీ' టీకాను వినియోగించేందుకు అత్యధికులు ఆసక్తి చూపుతున్నారని ఆర్డీఐఎఫ్ పేర్కొంది.
భారత్లో స్పుత్నిక్ వీ టీకా రెండో, మూడో దశల క్లినికల్ ట్రయల్స్ నిర్వహించేందుకు డా.రెడ్డీస్ ల్యాబ్తో సెప్టెంబర్లో ఒప్పందం కుదుర్చుకుంది రష్యా.
ఇదీ చూడండి:'భారత్, చైనాలో మా టీకాను ఉత్పత్తి చేస్తాం'
