ఆమె కళ్లు.. రెండు ప్రపంచ యుద్ధాలను చూశాయి. ఆమె శరీరం అతి ప్రమాదకరమైన స్పానిష్ ఫ్లూనూ తట్టుకుని నిలిచింది. జీవితంలో ఎన్నో ఆటుపోట్లను చూసిన ఆమె.. చివరికి కరోనా వైరస్తో కన్నుమూసింది. ఆమె.. బ్రిటన్కు చెందిన 108ఏళ్ల హిల్డా చర్చిల్.
అతి పెద్ద వయస్కురాలు...
బ్రిటన్లో వైరస్ బారిన పడిన అతి పెద్ద వయస్కురాలు చర్చిల్. వచ్చే ఏప్రిల్ 5న తన 109వ పుట్టిన రోజు జరుపుకోవాల్సి ఉండగా.. శనివారం ఆమె మరణించారు. కరోనా పాజిటివ్గా తేలిన 24 గంటల వ్యవధిలోనే ఈ ఘటన జరిగింది.
1918లో స్పానిష్ ఫ్లూ.. ప్రపంచ దేశాలను గడగడలాడించింది. ఈ మహమ్మారి బారిన పడి ప్రపంచవ్యాప్తంగా దాదాపు 50 మిలియన్ మంది ప్రజలు ప్రాణాలు కోల్పోయారు. వీరిలో హిల్డా చర్చిల్ 12నెలల సోదరి కూడా ఉంది. ఆ తర్వాత నెలకొన్న పరిస్థితుల కారణంగా హిల్డా.. పని కోసం సాల్ఫోర్డ్కు వలస వెళ్లినట్టు ఆమె మనవడు ఆంటోనీ చర్చిల్ తెలిపారు.
"ఆమెకు కావాల్సిన సమయంలో మేము అందుబాటులో ఉండలేకపోయాం. ఇదే అత్యంత విషాదకరం. ఎన్నోసార్లు మమ్మల్ని ఆదుకున్న ఆమెకు మేము అండగా నిలవలేకపోయం. ఈ ఘటన మాకు ఎంతో బాధాకరం. హిల్డా పుట్టిన రోజు కోసం మేము ఎంతో ఉత్సాహంగా ఎదురుచూశాం."
-- ఆంటోనీ చర్చిల్, హిల్డా మనవడు.
కరోనా వైరస్ ధాటికి బ్రిటన్లో 1,019 మంది ప్రాణాలు కోల్పోయారు. మరో 17వేల 089 మంది వైరస్ బారిన పడ్డారు. వీరిలో బ్రిటన్ ప్రధాని బోరిస్ జాన్సన్ కూడా ఉన్నారు.
ఇదీ చూడండి:- గర్భిణికి కరోనా సోకితే.. పుట్టే బిడ్డ పరిస్థితి ఏంటి?
