భారత్లో కరోనా వైరస్ కట్టడికి ప్రపంచ బ్యాంకు 100 కోట్ల డాలర్ల అత్యవసర సాయం అందించేందుకు ముందుకొచ్చింది. అందుకు సంబంధించిన ప్రక్రియకు ఆమోదం తెలిపింది.
ప్రపంచ బ్యాంకు గతంలోనే 25 దేశాలకు సాయం అందించేందుకుగాను 190 కోట్ల డాలర్లు ప్రాజెక్ట్కు పచ్చజెండా ఊపింది. ఇప్పుడు మరో 40 దేశాలకు సాయం అందించేందుకు సిద్ధమవుతోంది. ప్రపంచ బ్యాంకు అందించే ఈ ఆర్థిక సాయంలో సింహభాగం భారత్కు అందుతుంది.
"ఈ నిధులతో భారత్లో ల్యాబ్లో సామర్థ్యం పెంచడానికి, పీపీఈల కొనుగోలుకు, మరిన్ని ఐసోలేషన్ వార్డులు సిద్ధం చేసుకోవడానికి వీలవుతుంది. ఫలితంగా కరోనా వైరస్ స్క్రీనింగ్ను మరింత సమర్థంగా చేపట్టడానికి మార్గం సుగమం అవుతుంది. అలాగే కాంటాక్ట్లను గుర్తించడం సులభమవుతుంది." - ప్రపంచ బ్యాంకు
దక్షిణాసియా దేశాలకు...
దక్షిణాసియా దేశాలైన పాకిస్థాన్కు 200 మిలియన్ డాలర్లు, అఫ్గానిస్థాన్కు 100 మిలియన్ డాలర్లు, మాల్దీవులకు 7.3 మిలియన్ డాలర్లు, శ్రీలంకకు 128.6 మిలియన్ డాలర్ల ఆర్థిక సాయం అందించనున్నట్లు ప్రపంచ బ్యాంకు తెలిపింది.
వచ్చే 15 నెలల్లో పూర్తిగా కరోనా వైరస్ను కట్టడికి, ఆర్థిక వ్యవస్థల పునరుత్తేజానికి... 160 బిలియన్ డాలర్ల భారీ ఆర్థిక ప్యాకేజీని అందించడానికి ప్రపంచ బ్యాంకు కృషి చేస్తోంది.
ఇదీ చూడండి: 'ఐకమత్య వెలుగులతో కరోనా చీకట్లపై పోరాటం'
