KTR Attend ACB Inquiry in Formula E-Race Case : ఫార్ములా ఈ-రేస్‌ వ్యవహారంలో బీఆర్ఎస్ కార్యనిర్వాహక అధ్యక్షుడు, మాజీ మంత్రి కేటీఆర్ ఏసీబీ విచారణ ముగిసింది. ఆయనతో పాటు న్యాయవాది రామచంద్రరావు ఏసీబీ కార్యాలయంలోనికి అనుమతించారు. దాదాపు ఆరున్నర గంటల పాటు కేటీఆర్ను ప్రశ్నించారు. కేసు దర్యాప్తు అధికారి డీఎస్పీ మజీద్ ఖాన్ కేటీఆర్ను విచారించారు. ఏసీబీ జాయింట్ డైరెక్టర్ రితిరాజ్ విచారణను పర్యవేక్షించారు. ఈ విచారణను వేరే గది కేటీఆర్ న్యాయవాది రామచంద్రరావు చూసేలా ఏర్పాట్లు చేశారు.
అంతకుముందు తన నివాసం నుంచి బయలుదేరే ముందు కేటీఆర్ మీడియాతో మాట్లాడారు. తెలంగాణ ప్రతిష్ఠను పెంచడానికి గతంలో మంత్రిగా ఎన్నో ప్రయత్నాలు చేశానని అన్నారు. బీఆర్ఎస్ హయాంలో తన బావమరుదులకు రూ.1137 కోట్ల కాంట్రాక్టులు ఇవ్వలేదని, కేబినెట్‌లో ఉండి తన కుమారుడి కంపెనీకి కాంట్రాక్టులు ఇవ్వలేదని తెలిపారు. తాను కాంట్రాక్టులు ఇచ్చి ప్రతిఫలంగా కార్లు కొనుక్కోలేదని, ఆ పనులు రేవంత్ రెడ్డి, వారి సహచర మంత్రులకే ఉన్నాయని అన్నారు. అరపైసా అవినీతి కూడా చేయలేదని ఆయన పేర్కొన్నారు.
భయపడేది లేదు : తెలంగాణ బ్రాండ్‌ ఇమేజ్‌ను ప్రపంచ పటంలో పెట్టడానికి కృషి చేశానని, ఆరు గ్యారెంటీలు అమలు చేయకపోతే బీఆర్ఎస్ ప్రశ్నించిందని, ముమ్మాటికీ రేవంత్ ఇచ్చిన హామీల గురించి ప్రశ్నిస్తునే ఉంటామని అన్నారు. తనపై ఎన్ని కేసులు పెట్టుకున్నా, భయపడేది లేదని స్పష్టం చేశారు. తెలంగాణ కోసం అవసమైతే ప్రాణాలు వదిలేస్తానని తెలిపారు. కేసీఆర్ కుమారుడిగా తెలంగాణ కోసం చస్తా తప్పా, తప్పుడు పనులు చేయనని పేర్కొన్నారు.
"నేను ఎలాంటి తప్పు చేయలేదు. సమస్యల గురించి దృష్టి మళ్లించేందుకే నాపై తప్పుడు కేసు. హైదరాబాద్‌ను ప్రపంచపటంలో నిలిపేందుకు కృషి చేశా. కేసీఆర్ కుమారుడిగా తెలంగాణ కోసం చస్తాను తప్ప తప్పు చేయను. నిజం నిలకడ మీద తెలుస్తుంది. రేవంత్‌రెడ్డి ఇచ్చిన హామీల గురించి ప్రశ్నిస్తునే ఉంటాం. ఏం జరిగినా శాంతియుతంగానే నిరసనలు తెలపండి." -కేటీఆర్, మాజీ మంత్రి
ఈడీ విచారణకు అర్వింద్ కుమార్ : ఇదే కేసులో ఏ2గా ఉన్న అర్వింద్ కుమార్ ఈడీ విచారణ కూడా ముగిసింది. సుమారు 8 గంటల పాటు ఈడీ అధికారులు ఆయనను ప్రశ్నించారు. నిబంధనలకు విరుద్ధంగా ఫార్ములా ఈ ఆపరేషన్స్ (ఎఫ్ఈఓ) సంస్థకు రూ.45.71 కోట్ల బదిలీపై అధికారులు ఆయన్ను ప్రశ్నించారు.
హరీశ్‌ రావు హౌస్ అరెస్టు : ఈ నేపథ్యంలో మాజీ మంత్రి హరీశ్‌ రావు నివాసం వద్ద పోలీసులు భారీగా మోహరించారు. హరీశ్‌ రావును గృహ నిర్బంధం చేశారు. అలాగే పలువురు బీఆర్ఎస్ నేతలను పోలీసులు గృహ నిర్బంధం చేశారు. మరో వైపు కేటీఆర్ నివాసానికి ఎమ్మెల్సీ కవితతో పాటు బీఆర్ఎస్ ఎమ్మెల్యేలు చేరుకున్నారు. భర్త అనిల్‌తో కలిసి కవిత కేటీఆర్ నివాసానికి వచ్చారు. ఎమ్మెల్యే పాడి కౌశిక్‌ రెడ్డి, మాజీ మంత్రులు సత్యవతి రాథోడ్‌,వేముల ప్రశాంత్‌ రెడ్డి, మాజీ ఎమ్మెల్యేలు పద్మా దేవేందర్‌ రెడ్డి, కోరుకంటి చందర్‌ తదితరులు చేరుకున్నారు.
కేటీఆర్కు హైకోర్టులో ఊరట - న్యాయవాదిని తీసుకెళ్లేందుకు అనుమతి
