ఓ సూపర్ మార్కెట్లో కొండచిలువ కలకలం రేపింది. షాపింగ్ చేస్తున్న మహిళకు అనూహ్యంగా ఎదురుపడింది. ఈ సంఘటన ఆస్ట్రేలియాలో జరిగింది.
ఒక్కసారిగా ఎదురుపడి..
సిడ్నీలోని వూల్వర్త్స్ మార్ట్లో హెలైనా అలటీ అనే మహిళ తనకు కావాల్సిన సరకుల కోసం వెతుకుతోంది. తొలుత ఆమెకు పామును చూడలేదు. ఎందుకంటే అది జాడీల వెనక దాగి ఉంది. ఈ క్రమంలోనే ఆమె కుడివైపు తిరగగా ఒక్కసారిగా 10 అడుగుల పైథాన్ తలను బయటకు పెట్టేసింది.
అయితే పాముల గురించే ఇదివరకే శిక్షణ పొందిన అలటీ.. ముందు దానిని చూసి షాక్ అయినా బెదరలేదు. కొండచిలువను గుర్తించిన వెంటనే అక్కడి ప్రజలను అప్రమత్తం చేసి, దూరంగా పంపింది.
అయితే మార్ట్ సిబ్బందికి కొండచిలువ గురించి చెప్పేముందు దానిని వీడియో తీసినట్లు తెలిపారు అలటీ. తన పాముల సంచిలో దానిని బంధిస్తానని మార్ట్ సిబ్బందికి చెప్పినప్పుడు వారు నమ్మలేదట. పక్కనే ఉన్న తన ఇంటికి వెళ్లి బ్యాగు తీసుకొచ్చిన అలటీ.. పైథాన్ను పట్టేసి సమీపంలోని అటవీ ప్రాంతంలో విడిచిపెట్టింది.
పామును చూడగానే అది విషంలేనిదని, ప్రమాదమేమీ కాదని గుర్తించినట్లు అలటీ తెలిపింది. అది మగది అని, తోడు కోసం వచ్చి ఉంటుందని చెప్పింది.
ఇదీ చూడండి: ఇంట్లో 'కోబ్రా'ల మకాం.. తవ్వినకొద్దీ బయటకు!
