సాంకేతిక విప్లవంతో ప్రపంచంలో ఏటా ఎన్నో కొత్త ఆవిష్కరణలు వస్తున్నాయి. వీటన్నింటినీ ప్రజలకు పరిచయం చేసే వేదికే 'కన్స్యూమర్స్ ఎలక్ట్రానిక్స్ షో' (సీఈఎస్). ఈ ఏడాది చైనా షాంఘై నగరంలో నిర్వహించిన ఈ కార్యక్రమంలో వాహనాల ప్రదర్శన అదిరిపోయింది.
'ఆడి'తో ఊహలలోకానికి...
భవిష్యత్తులో ప్రయాణం ఎలా ఉండబోతుందో కార్ల తయారీ దిగ్గజం 'ఆడి' చూపించేసింది. వాహనాలను వినోద కేంద్రంగా మార్చేస్తోంది. కార్లోనే సినిమా, వీడియో గేమ్స్ ఆడుకునేలా 'హోలో రైడ్' సంస్థతో కలిసి కొత్త సాంకేతికతను పరిచయం చేస్తోంది.
"గణాంకాలు చూస్తే 25 శాతం మంది ప్రయాణంలో ఉన్నప్పుడు దృశ్యాన్ని ఆస్వాదించలేరు. ఇందుకు కారణం వెళ్లే వేగం, వాళ్లు చూసే అంశంతో సరిపోలకపోవటమే. ఈ సమస్యను ఎదుర్కొనేందుకు మేం మూడు ప్రధాన సాంకేతికతలను ఏకం చేశాం. వాహనానికి అనుసంధానం చేసిన ఐఓటీతో లొకేషన్, వేగం, బ్రేకింగ్, స్టీరింగ్ స్థానం అన్నింటి సమాచారం ఈ వ్యవస్థ నిక్షిప్తం చేస్తుంది. ఈ ఐఓటీతో కృత్రిమ మేధ, వర్చువల్ రియాల్టీ సెన్సార్లు జోడించి ఊహల లోకంలో విహరించవచ్చు."
-నిల్స్ వాల్నీ, హోలో రైడ్ సీఈఓ
ఈ కారు వెనక సీట్లో కూర్చున్నప్పుడు హాయిగా వర్చువల్ ప్రపంచలోకి వెళ్లొచ్చు. ఇందులో వీఆర్తో పాటు మనం ఎటు వెళుతున్నాం? ఎక్కడికి వెళ్లాలి? బయట ఏం జరగుతుందో కూడా తెలిసిపోతుంది.
స్వతంత్ర చోదక వ్యవస్థ
దక్షిణ కొరియా దిగ్గజ సంస్థ హ్యుందయ్.. మరో కొత్త అంశంతో ముందుకు వచ్చింది. అదే ఎం-విజన్ పేరిట రూపొందించిన స్వతంత్ర చోదక వ్యవస్థ. ఇందులో మల్టీడైరెక్షన్ కెమెరాలు, షార్ట్కట్, ప్రత్యామ్నాయ మార్గాలు, వాతావరణాన్ని గుర్తించటం ఇలా ఎన్నో అంశాలు ఉన్నాయి. వీటి సాయంతో మనమేదీ చేయకుండానే అన్నీ జరిగిపోతాయి. కేవలం సినిమా చూస్తూ కూర్చోవాలంతే. మన మూడ్ బట్టి పాటలు, లైట్స్ థీమ్ను కూడా మారుస్తుంది. ఇతర వాహనాలకు హెచ్చరికలు, సూచనలు చేస్తుంది. ఇంతకన్నా ఏం కావాలి చెప్పండి!
"ఇందులో ఎన్నో ఆటోపైలట్ సెన్సార్స్, లైట్స్ ఉన్నాయి. మొదటగా ఎం-విజన్ మన పరిసరాలను గుర్తిస్తుంది. ఈ సమాచారంతో వెనకాల ఉన్న డిజిటల్ లైట్తో పరిసరాలతో అనుసంధానం అయి సూచనలు చేస్తుంది."
-ఓహెచ్ క్వోన్సుక్, ఎం-విజన్ డెవలపర్
చైనా కంపెనీ 'ఇన్సెప్షియో'.. భారీ వాహనాల్లోనూ స్వయం చోదక వ్యవస్థను పరిచయం చేసింది.
ఇదీ చూడండి: పెట్రో ధరల పెరుగుదలకు కారణం తెలుసా?
