అంతర్జాతీయ సమాజానికి పెనుముప్పుగా మారిన తీవ్రవాదం, దాని సంబంధిత నేరాలను ఉపేక్షించరాదని భారత్ పిలుపునిచ్చింది. ఉగ్రవాదంపై పోరులో ద్వంద్వ విధానాలకు తావుండరాదని సూచించింది. ఐక్యరాజ్యసమితి, షాంఘై సహకార సమాఖ్య ఆధ్వర్యంలో శాంతి, భద్రత, సుస్థిరతను నెలకొల్పేలా పరస్పర సహకారం, తీవ్రవాదం, వ్యవస్థాగత నేరాల నియంత్రణ అనే అంశంపై ప్రత్యేక సమావేశం జరిగింది. ఈ సమావేశంలో ఐక్యరాజ్యసమితిలో భారత శాశ్వత రాయబారి సయ్యద్ అక్బరుద్దీన్ పాల్గొన్నారు. తీవ్రవాదం- వ్యవస్థాగత నేరాలు అంతర్జాతీయ సమాజానికి పెనుముప్పుగా పరిణమిస్తున్నాయన్నారు .
తీవ్రవాదం ప్రతిరోజూ తనరూపురేఖలు మార్చుకుంటోందనారు అక్బరుద్ధీన్. దీనిని ఎదుర్కొనేందుకు ప్రపంచదేశాలు నూతన సాంకేతికతను ఉపయోగించాల్సిన అవసరముందన్నారు. ఉగ్రవాదంపై పోరులో ద్వంద్వ విధానాలకు తావుండరాదని సూచించారు.
లష్కరే తోయిబా, జైషే మహమ్మద్ తదితర ఉగ్రసంస్థలు సరిహద్దుల వద్ద ఉగ్రవాదాన్ని ప్రోత్సహిస్తూ అస్థిరతకు ప్రయత్నిస్తున్నాయన్నారు అక్బరుద్దీన్. ఉగ్రవాదం, వ్యవస్థాగత నేరాలకు వ్యత్యాసాలు ఉన్నప్పటికీ ఒకే దుష్టశక్తుల నుంచి వాటికి సహాయ సహకారాలు అందుతున్నాయని తెలిపారు. హింసను ప్రోత్సహించడం ద్వారా పాలన, అభివృద్ధి, సామాజిక సమైక్యతను అణగదొక్కాలని ఆ శక్తులు ప్రయత్నిస్తున్నాయని అక్బరుద్దీన్ చెప్పారు.
ఇదీ చూడండి: 'నా ఆరోగ్యం భేష్.. మీడియాకే అనారోగ్యం'
