తాలిబన్లు అధికారంలోకి వస్తే రెండు దశాబ్దాల క్రితం నాటి వారి అరాచక పాలన మళ్లీ వస్తుందని భయపడుతున్న ప్రజల అంచనాలే నిజమవుతున్నాయి. హజారా నాయకుడు అబ్దుల్ అలీ మజారీ విగ్రాహాన్ని వారు పేల్చి వేశారు. బామియాన్లో ఉన్న ఈ ప్రతిమను నామరూపాల్లేకుండా చేశారు. గతంలో ఈ ప్రాంతంలోనే బుద్ధుని విగ్రహం, చారిత్రక కట్టడాలను తాలిబన్లు ధ్వంసం చేశారు. ఈ విషయాన్ని మానవహక్కుల ఉద్యమకారుడు సలీ జావేద్ ట్విట్టర్ ద్వారా వెల్లడించారు. అఫ్గాన్ ప్రజలకు తాలిబన్లు చాలా పెద్ద క్షమాభిక్ష పెట్టారని మండిపడ్డారు.
హజారా నేత అబ్దుల్ అలీని 1995లోనే తాలిబన్లు ఉరితీశారు. చాలా ఏళ్లుగా ఆ వర్గం వారిపై దాడులకు తెగబడుతూనే ఉన్నారు.
హజారాలు ఓ సంప్రదాయ తెగ. మధ్య అఫ్గాన్లోని పర్వత ప్రాంతం హజారత్లో వారు అధికంగా ఉంటారు. 13 శతాబ్దానికి చెందిన మొంగోల్ రాజ్య స్థాపకుడు గెంఘిస్ ఖాన్కు వారసులుగా వీరిని చెప్పుకుంటారు.
తమ వర్గానికి చెందిన సలీమా హజారీని కూడా తాలిబన్లు నిర్బంధించారని హజారా వర్గాలు తెలిపాయి. అఫ్గాన్ జిల్లాలకు ఉన్న అతికొద్ది మంది మహిళా గవర్నర్లలో ఈమె ఒకరు.
ఇదీ చూడండి: శాంతి జపంతో మీడియా ముందుకు తాలిబన్లు
