చేతి వేళ్లకు డిజిటల్​ శక్తినిచ్చే 'వైవ్​ ప్రో'...!

చేతులతో సైగలు చేస్తూ తోటివారితో సంభాషించగలం. మరి కంప్యూటర్లతో అలా చేయగలమా? తెరపై ఏం జరగాలో చేతి వేళ్లు కదిపి ఆదేశించగలమా? ఈ ప్రశ్నలకు ఔనని సమాధానమిస్తోంది ఎలక్ట్రానిక్​ దిగ్గజం హెచ్​టీసీ. ఇందుకోసం వైవ్​ ప్రో పేరిట కొత్తతరం హెడ్​సెట్​ రూపొందించింది.

వర్చువల్​ రియాలిటీ... దృశ్య వీక్షణంలో ఇదో సంచలనం. చరవాణి, టీవీ, థియేటర్​లలో దృశ్యాలు కేవలం తెరపైనే చూశామన్న భావన కలుగుతుంది.

వర్చువల్​ రియాలిటీ సాంకేతికతో మీరు చూసే వీడియోలో ప్రత్యక్ష అనుభూతిని పొందొచ్చు. అందుకు అనుగుణంగా వీఆర్​ హెడ్​సెట్​లు మనకు అందుబాటులో ఉన్నాయి.

ఇదీ ఇప్పటివరకూ ఉన్న సౌలభ్యం. అంతకుమించి అంటూ వచ్చింది తైవాన్​ ఎలక్ట్రానిక్ దిగ్గజం హెచ్​టీసీ. మన చేతివేళ్ల కదలికలతో దృశ్యాలను నియంత్రించేలా ' వైవ్​ ప్రో' హెడ్​సెట్​లలో సరికొత్త సాఫ్ట్​వేర్​ను అందుబాటులోకి తెచ్చిందీ సంస్థ.

ఇప్పటికే ఇలాంటి సాంకేతికత ఉన్నా.. దానికోసం ప్రత్యేకమైన చేతి తొడుగు వాడాల్సి వచ్చేది.

వైవ్​ ప్రో

'వైవ్​ ప్రో' హెడ్​సెట్​తో చేతి వేళ్లను కదిలిస్తూ మనం చూస్తున్న దృశ్యాలను నియంత్రించవచ్చు.

హెడ్​సెట్​ బయటి వైపు రెండు కెమెరాలు ఉంటాయి. మన చేతి కదలికలను 21 పాయింట్లుగా గుర్తిస్తాయి ఈ కెమెరాలు. వీటికి అనుగుణంగా ఐదు ప్రామాణిక సంజ్ఞలను సాఫ్ట్​వేర్​లో పొందుపరిచారు. మన చేతులను కదిలిస్తూ కావాల్సిన విధంగా దృశ్య అనుభూతిని పొందవచ్చు.

'వైవ్​ ప్రో' కిట్​ను​ డెవలపర్లకు ఉచితంగా అందుబాటులోకి తీసుకొచ్చింది సంస్థ. అమెరికా శాన్​ ఫ్రాన్సిస్కో నగరంలో మార్చ్​లో జరిగిన 'గేమ్​ డెవలపర్స్​ కాన్ఫరెన్స్​'లో 'వైవ్​ ప్రో'ను మొదటి సారిగా ప్రదర్శించింది హెచ్​టీసీ.

వర్చువల్ రియాలిటీపై మరో సంస్థ 'ఆక్యులస్' పని చేస్తోంది. ఇదే తరహా హెడ్​సెట్​ను విపణిలోకి త్వరలో తెచ్చేందుకు సన్నాహాలు చేస్తోంది.