కరోనా ఆవిర్భావంపై పరిశోధన సాగిస్తున్న అంతర్జాతీయ శాస్త్రవేత్తలు.. గబ్బిలాలలో 24 కొత్త రకం కరోనా వైరస్లను గుర్తించారు. వీటన్నింటినీ నైరుతి చైనాలో 4 కి.మీ పరిధిలోనే కనుగొన్నారని సౌత్ చైనా మార్నింగ్ పోస్ట్ వెల్లడించింది. ఇందులో నాలుగు వైరస్లు కొవిడ్-19కు కారణమయ్యే స్ట్రెయిన్కు సంబంధించినవని పేర్కొంది. ఓ వైరస్ రకం.. 'సార్స్-కోవ్-2'ను పోలిన జన్యువును కలిగి ఉందని తెలిపింది. అయితే, ప్రస్తుత మహమ్మారికి ఇవేవీ ప్రత్యక్ష మూలాలు కాకపోవచ్చని వివరించింది. ఇందుకు సంబంధించి ఓ నివేదికను ప్రస్తావించింది.
తాజా పరిశోధనకు షాండోంగ్ ఫస్ట్ మెడికల్ యూనివర్సిటీకి చెందిన ప్రొఫెసర్ షి వెయిఫోంగ్ నేతృత్వం వహించారు. ఆర్పీవైఎన్06 అనే ఓ వైరస్కు.. సార్స్-కోవ్-2కు 94.5 శాతం పోలికలు ఉన్నాయని వీరు గుర్తించారు. కొన్నేళ్ల క్రితం యున్నాన్లో కనుగొన్న ఆర్ఎటీజీ13 అనే వైరస్.. సార్స్ వైరస్కు 96 శాతం పోలి ఉందని తెలిపారు. 'దీని బట్టి... సార్క్-కోవ్-2 మూలాలు.. ఆర్పీవైఎన్06, ఆర్ఎటీజీ13 నుంచి దశాబ్దాల క్రితమే వేరువడి ఇతర జాతులతో కలిశాయని స్పష్టమవుతోంది' అని పరిశోధకులు పేర్కొన్నారు. ఇంత చిన్న ప్రదేశంలో అన్ని రకాల వైరస్ జాతులను గుర్తించడం ఊహించని విషయమని అన్నారు. దీనివల్ల సార్స్-కోవ్-2 వైరస్ ఆవిర్భావంపై ఉన్న చిక్కుముళ్లను పరిష్కరించడం మరింత కఠినతరం కానుందని పేర్కొన్నారు.
కొత్త వేరియంట్లు..
కొత్త వైరస్లలో చాలా వరకు ఉష్ణమండల ప్రాంతాల్లోనే బయటపడ్డట్లు షాంఘైకి చెందిన ఓ శాస్త్రవేత్త పేర్కొన్నారు. వైరస్లు... ఇతర వైరస్లతో కలిసి కొత్త వేరియంట్ ఏర్పడేందుకు అక్కడి వేడి వాతావరణం, సమృద్ధిగా ఉండే జంతు జాతులు తోడ్పడినట్లు చెప్పారు.
ఇదీ చదవండి: జలాశయంలో మునిగి ఐదుగురు దుర్మరణం
