పాకిస్థాన్లో జరిగిన విమాన ప్రమాదానికి సంబంధించి జరుగుతున్న దర్యాప్తు తీరుపై ఆ దేశ ప్రధానమంత్రి ఇమ్రాన్ ఖాన్ ఆగ్రహం వ్యక్తం చేశారు. ప్రమాదానికి గల కారణాలు కనుగొనడంలో ఎందుకు జాప్యం జరుగుతోందని అధికారులను ప్రశ్నించారు. దర్యాప్తులో వెలుగుచూసిన వాటిని ప్రజలతో పంచుకోవాలన్నారు.
ఈ నేపథ్యంలో ప్రమాదానికి సంబంధించిన ప్రాథమిక దర్యాప్తు నివేదికను జూన్ 22న పార్లమెంట్ ముందు ప్రవేశపెట్టనున్నట్టు పాక్ విమానయానశాఖ మంత్రి ఘులామ్ సర్వార్ ఖాన్ వెల్లడించారు. దర్యాప్తు స్వేఛ్చగా, పారదర్శకంగా జరుగుతుందన్నారు.
గత శుక్రవారం.. లాహోర్ నుంచి కరాచీ వెళ్తున్న దేశీయ విమానం.. జిన్నా అంతర్జాతీయ విమానాశ్రయానికి సమీపంలోని నివాసాలపై కుప్పకూలింది. ఈ ఘటనలో 97 మంది మరణించారు. ఇద్దరు ప్రయాణికులు బయటపడ్డారు.
కాక్పిట్ స్వాధీనం...
మరోవైపు పాకిస్థాన్ విమాన ప్రమాదం జరిగిన దాదాపు వారం రోజులకు.. శిథిలాల నుంచి కాక్పిట్ను స్వాధీనం చేసుకుంది ఓ విదేశీ బృందం.
ఎయిర్బస్ సంస్థ ప్రతినిధులతో సహా 11 మంది సభ్యుల బృందం.. గురువారం ఘటనాస్థలాన్ని సందర్శిచింది. ఐదు గంటలపాటు అన్వేషించిన అనంతరం కాక్పిట్ వాయిస్ రికార్డ్ను స్వాధీనం చేసుకుంది. దర్యాప్తులో ఈ కాక్పిట్ కీలక పాత్ర పోషించనుంది.
దర్యాప్తు బృందం 26న కరాచీకి చేరుకుంది. రెండు రోజుల అనంతరం వెనుదిరగాల్సి ఉంది. కొన్ని కీలక ఆధారాలు లభించకపోవడం వల్ల తిరుగుప్రయాణాన్ని వాయిదా వేసుకుంది. ఈ బృందంలో ఫ్రాన్స్, జర్మనీ, బ్రిటన్ సహా ఇతర దేశాలకు చెందిన సభ్యులు ఉన్నారు.
ఘటనాస్థలంలో ఫోరెన్సిక్ పరీక్షలు నిర్వహించింది. కొన్ని విమాన భాగాలను సేకరించింది. అనంతరం విమానాశ్రయం లోపలికి వెళ్లి అక్కడి రాడార్ వ్యవస్థ, విమాన్ టేక్ ఆఫ్- ల్యాండింగ్ వసతులను పరిశీలిచింది.
ఇదీ చూడండి:- పాక్ విమానం కూలకముందు ఏం జరిగిందంటే?
