పార్లమెంట్ను రద్దు చేసి నేపాల్లో రాజకీయ సంక్షోభానికి తెరలేపారు కేపీ శర్మ ఓలి. అధికారం కోసం పార్టీలో వర్గ పోరు నడుస్తున్న సమయంలో ఈ పరిణామాలు చోటు చేసుకోవడం... నేపాల్ రాజకీయాలను అస్థిరతలో పడేసింది. అయితే.. మెజారిటీ సభ్యుల మద్దతు కోల్పోయినందునే చివరి ప్రయత్నంగా పార్లమెంట్ రద్దును ఓలి చేపట్టారని నిపుణులు చెబుతున్నారు. ఇలాంటి చర్యలు ముందుగా ఊహించినవేనని అంటున్నారు.
ఇదీ చదవండి: నేపాల్ పార్లమెంటుపై 'ఖడ్గ' చాలనం
"పార్టీలో అధికారం కోసం గొడవలు చాలా కాలంగా జరుగుతున్నాయి. ఏవో కఠిన నిర్ణయాలు తీసుకుంటారని ఇప్పటికే అనుమానాలు వ్యక్తమయ్యాయి. పార్టీ నుంచి వచ్చిన ఒత్తిడికి ఓలి లొంగలేదు. పార్టీని ఎదిరించారు. ఈ ఎత్తుగడలు ఊహించినవే. పార్లమెంట్లో విశ్వాస తీర్మానం నెగ్గలేనని ఓలికి తెలుసు. తనకు మెజార్టీ మద్దతు లేనందునే పార్లమెంట్ను రద్దు చేశారు."
-ఎస్డీ ముని, విదేశీ వ్యవహారాల నిపుణులు
నేపాల్లో ప్రస్తుతం జరుగుతున్న పరిణామాలపై ఈటీవీ భారత్తో ప్రత్యేకంగా మాట్లాడారు భారత ప్రభుత్వ మాజీ రాయబారి ఎస్డీ ముని. పార్లమెంట్ను రద్దు చేస్తూ ఓలి తీసుకున్న నిర్ణయం రాజ్యాంగబద్ధమేనని సుప్రీంకోర్టు తేల్చితే.. ఆ దేశంలో ఎన్నికలు జరుగుతాయని చెప్పారు. వ్యతిరేకంగా తీర్పు వస్తే ఓలి రాజీనామా చేయాల్సి ఉంటుందని అన్నారు. ఒకవేళ ఎన్నికలు జరిగితే పార్టీ రెండుగా చీలిపోవడం ఖాయమని జోస్యం చెప్పారు. అదే జరిగితే రాచరిక శక్తులతో కలిసేందుకు ఓలి వెనకాడరని తెలిపారు.
"ఒకవేళ పార్టీ చీలిపోతే కొన్ని సమీకరణాలు మారిపోతాయి. అవి ఊహించడం కష్టమే. రాచరిక శక్తులతో చేతులు కలిపేందుకు కూడా ఓలి వెనకాడరని నేను అనుమానిస్తున్నాను. భారత్లోని భాజపా వర్గాల నుంచి వారికి కొంత మద్దతు వస్తుండటం వల్ల వారు(రాచరికవాదులు) పటిష్ఠంగా మారుతున్నారు. ఎలాంటి కూటములు వస్తాయో చెప్పలేం. అయితే వీరు కలిసే ఆస్కారం ఉంది. నేపాలీ కాంగ్రెస్ అనుమతించే అవకాశం లేదు కాబట్టి షేర్ బహదుర్ దేవాతో చేతులు కలపకపోవచ్చు. పలు చిన్నపార్టీలతోనూ కలిసే అవకాశం ఉంది."
-ఎస్డీ ముని, విదేశీ వ్యవహారాల నిపుణులు
భారత్కు ఏంటి?
నేపాల్ రాజకీయ సంక్షోభంపై భారత్ ఇప్పుడు అయోమయంలోనే ఉందని తెలిపారు ముని. నేపాల్లో ఏ ప్రభుత్వం వస్తుంది, ఏ కూటమి అధికారం చేపడుతుందనే అంశంపై స్పష్టత లేదని అన్నారు.
"భారత్కు చైనాతో భద్రతాపరంగా ముప్పు ఉంది. సరిహద్దుతో పాటు, సంఘ వ్యతిరేక శక్తుల సమస్య ఉంది. కొన్ని వర్గాలకు భారత్ మద్దతు ఇవ్వచ్చు. కానీ నేపాల్లో అధికార పంపిణీ పెద్ద సమస్యతో కూడుకున్నది. నేపాల్లో రాజకీయ అస్థిరత.. అధికార పంపిణీ వల్లే తలెత్తుతూ ఉంటుంది. ప్రస్తుత సంక్షోభం ఎలా ముగుస్తుందో మనకు తెలీదు."
-ఎస్డీ ముని, విదేశీ వ్యవహారాల నిపుణులు
నేపాల్లో రాజకీయ అస్థిరత.. భారత్కు మంచిది కాదని ముని పేర్కొన్నారు. ఇది మన దేశంపై ప్రతికూల ప్రభావం చూపుతుందని అన్నారు. ఏ ప్రభుత్వం అధికారంలోకి వస్తుందనేది తెలియనప్పటికీ.. ఓలి కఠిన పరిస్థితుల్లో ఉండటం, కమ్యునిస్టు పార్టీ విచ్ఛిన్నం కావడం భారత్కు కొంతవరకు సాంత్వన కలిగించేదని చెప్పారు. ఎన్సీపీ అధికారంలోకి రాకూడదని కోరుకుంటున్నప్పటికీ.. ఎవరు ఎవరితో కలుస్తారనేది తెలియాల్సి ఉందని పేర్కొన్నారు.
ఇవీ చదవండి:
భారత్-నేపాల్ వివాద ఫలితం.. జల ఆశయాలకు గండి?
భారత్పై నేపాల్కు ఎందుకంత అక్కసు?
