'కశ్మీర్​పై మోదీ చివరి అస్త్రాన్ని వినియోగించేశారు'

ప్రధాని నరేంద్రమోదీతో పాటు అంతర్జాతీయ మీడియాపై ఆగ్రహం వ్యక్తం చేశారు పాక్​ ప్రధాని ఇమ్రాన్ ఖాన్​. కశ్మీర్​ అంశంలో ఆర్టికల్​ 370తో మోదీ చివరి అస్త్రాన్ని వినియోగించారన్న ఆయన... కశ్మీర్​లో జరుగుతున్న మానవహక్కుల ఉల్లంఘనలను అంతర్జాతీయ మీడియా పట్టించుకోవడం లేదని విమర్శించారు.

జమ్ముకశ్మీర్​ అంశంలో ప్రధాని నరేంద్ర మోదీ తప్పు చేశారని విమర్శించారు పాక్​ ప్రధాని ఇమ్రాన్​ ఖాన్. అలాగే కశ్మీర్​ అంశంలో ఆర్టికల్​ 370 రద్దుతో మోదీ తన చివరి అస్త్రాన్ని వినియోగించేశారని పేర్కొన్నారు. కశ్మీర్​ ప్రజలకు సంఘీభావంగా ఇస్లామాబాద్​లో ఏర్పాటు చేసిన 'హ్యూమన్​ చైన్'​ కార్యక్రమంలో పాల్గొన్న ఇమ్రాన్​ ఈ వ్యాఖ్యలు చేశారు.

" నరేంద్రమోదీ తప్పు చేశారు. మోదీ తన చివరి అస్త్రాన్ని వినియోగించేశారు. కానీ, కశ్మీర్​ ప్రజలకు ఎలాంటి భయం లేదు. ఆర్టికల్​ 370 రద్దు నిర్ణయాన్ని వారు ఎప్పటికీ అంగీకరించరు."
- ఇమ్రాన్​ఖాన్​, పాక్ ప్రధాని

కశ్మీర్​ అంశాన్ని అంతర్జాతీయ మీడియా విస్మరిస్తోందని ఇమ్రాన్​ ఆగ్రహం వ్యక్తం చేశారు. హాంకాంగ్​ నిరసనలపైనే దృష్టి సారించిన మీడియా.. కశ్మీర్​ అంశాన్ని పూర్తిగా వదిలేసిందని ఆరోపించారు. ఆర్టికల్​ 370ని రద్దు చేస్తూ భారత ప్రభుత్వం తీసుకున్న నిర్ణయాన్ని కశ్మీర్​ ప్రజలు వ్యతిరేకిస్తారన్నారు ఇమ్రాన్​. ఒక్కసారి ఆంక్షలు తొలగిస్తే కశ్మీర్​ ప్రజలంతా నిరసనబాట పడతారని ట్వీట్​ చేశారు.

ఇమ్రాన్​ఖాన్​ ట్వీట్​

" హాంకాంగ్​ నిరసనలు హెడ్​లైన్​లో వేస్తున్న అంతర్జాతీయ మీడియా.. జమ్ముకశ్మీర్​లో జరగుతున్న మానవహక్కుల ఉల్లంఘనను వదిలేయడమేంటో నాకు అంతుచిక్కడం లేదు. వివాద భూభాగంగా అంతర్జాతీయ సమాజం గుర్తించిన ప్రాంతాన్ని 9 లక్షల మంది భద్రతా సిబ్బందితో.. కశ్మీర్​ ప్రజలను నిర్బంధించి.. భారత్​ అక్రమంగా ఆక్రమించింది. "
- ఇమ్రాన్​ఖాన్​, పాక్ ప్రధాని