Pakistan bomb blast: పాకిస్థాన్ నైరుతి ప్రాంతం బలోచిస్థాన్ రాష్ట్రంలో శుక్రవారం భారీ పేలుడు సంభవించింది. రోడ్డు పక్కన జరిగిన బాంబు పేలుడులో నలుగురు ప్రాణాలు కోల్పోయారు. మరో 10 మంది తీవ్రంగా గాయపడినట్లు పోలీసులు తెలిపారు.
డేరా బుగ్టి జిల్లాలోని మాట్ ప్రాంతంలో బాధితులు ఓ వాహనంలో ప్రయాణిస్తుండగా బాంబు పేలినట్లు పోలీసులు వెల్లడించారు. ఈ దాడిలో తన బంధువు ఒకరు సైతం ప్రాణాలు కోల్పోయినట్లు ఆ ప్రాంత సెనేటర్ సర్ఫరాజ్ బుగ్టి తెలిపారు. ఈ పేలుడు వెనక నిషేధిత బలోచ్ రిపబ్లిక్ ఆర్మీ(బీఎల్ఏ) ఉన్నట్లు భావిస్తున్నామన్నారు.
" అమాయక ప్రజలను కాపాడటంలో రాష్ట్ర, కేంద్ర ప్రభుత్వాలు విఫలమయ్యాయి. ఇలాంటి ఘటనలు.. ప్రజలు సొంతంగా రక్షణ చర్యలు ఏర్పాటు చేసుకునేందుకు కారణమవుతాయి. బలోచిస్థాన్లో తగిన చర్యలు చేపట్టాల్సిన అవసరం ఉంది."
- సర్ఫరాజ్ బుగ్టి, స్థానిక సెనేటర్.
రాష్ట్రంలో శాంతి భద్రతలకు విఘాతం కలిగించేందుకు ఉగ్రమూకలు మరోమారు క్రూరమైన చర్యలకు పాల్పడ్డాయని పేర్కొన్నారు బలోచిస్థాన్ రాష్ట్ర ముఖ్యమంత్రి మిర్ అబ్దుల్ క్యద్దుస్ బిజెంజో. ఉగ్రవాదులపై తగిన చర్యలు తీసుకుంటామన్నారు.
ఇదే రాష్ట్రంలోని కెచ్ ప్రాంతంలో సైనిక స్థావరంపై దాడి జరిగి 10 మంది జవాన్లు ప్రాణాలు కోల్పోయిన రెండు రోజుల తర్వాతే ఈ పేలుడు జరగటం గమనార్హం.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: ఉగ్రదాడిలో 10 మంది పాక్ సైనికులు మరణం
