గిల్గిత్-బాల్టిస్థాన్లో తాత్కాలిక ప్రభుత్వాన్ని ఏర్పాటు చేసి అసెంబ్లీ ఎన్నికలు నిర్వహించాలని ఆదేశాలు జారీ చేశారు పాకిస్థాన్ అధ్యక్షుడు ఆరిఫ్ అల్వి. ఆ రాష్ట్రంలో ఎన్నికలు నిర్వహించేందుకు పాక్ సుప్రీంకోర్టు ఇటీవలే అనుమతిచ్చిన నేపథ్యంలో ఈ మేరకు ఉత్వర్వులు జారీ చేశారు.
గిల్గిత్-బాల్టిస్థాన్లో ఎన్నికలు నిర్వహించడాన్ని భారత్ తీవ్రంగా వ్యతిరేకిస్తోంది. జమ్ము కశ్మీర్, లద్దాఖ్ కేంద్ర పాలిత ప్రాంతాలతో పాటు గిల్గిత్-బాల్టిస్థాన్ భారత భూభాగంలోనే ఉందని ఇప్పటికే స్పష్టం చేసింది. పాక్ సూప్రీంకోర్టు ఇచ్చిన తీర్పుపైనా నిరసన వ్యక్తం చేసింది.
ఈ ప్రాంతంలో సార్వత్రిక ఎన్నికలు నిర్వహించేలా 2018 పరిపాలనా ఉత్తర్వులను సవరించడానికి పాక్ ప్రభుత్వానికి ఏప్రిల్ 30న ఆ దేశ సుప్రీంకోర్టు అనుమతిచ్చింది. అనంతరం గిల్గిత్-బాల్టిస్థాన్ సహా కశ్మీర్, లద్దాఖ్లు భారత్లో అంతర్భాగమని పాక్ సీనియర్ దౌత్య అధికారికి నిరసన తెలియజేసింది భారత విదేశాంగ శాఖ. అక్రమంగా, బలవంతంగా పాక్ కలగజేసుకోవాలని ప్రయత్నిస్తోందని తెలిపింది.
గిల్గిత్-బాల్టిస్థాన్ ప్రభుత్వ గడువు జూన్ 24న ముగుస్తుంది. తాత్కాలిక ప్రభుత్వం ఏర్పాటుకు ఎటువంటి నిబంధనలు లేవని, పాక్ అధ్యక్షుని ఆదేశాలతో ఆ సమస్య తీరిపోయిందని పాకిస్థాన్ తెహ్రీక్ ఏ ఇన్సాఫ్ రాష్ట్ర అధ్యక్షుడు సయ్యద్ తెలిపారు. రెండు నెలల్లో ఎన్నికలు నిర్వహిస్తారని చెప్పారు. కరోనా ప్రభావం ఉన్నప్పటికీ ప్రత్యేక ఏర్పాట్లు చేస్తామన్నారు.
గిల్గిత్-బాల్టిస్థాలో రూ.442 బిలియన్లు విలువ చేసే డ్యామ్ను నిర్మించేందుకు చైనాతో ఇటీవలే ఒప్పందం కుదుర్చుకుంది పాక్. వివాదాస్పద భూభాగంలో ఇలాంటి ప్రాజెక్టు నిర్మించడం తగదని భారత్ ఇప్పటికే స్పష్టం చేసింది.
