ప్రాణాలను కాపాడే కీలక డ్రగ్స్ను భారత్ నుంచి దిగుమతి చేసుకునే ముసుగులో విటమిన్ ట్యాబ్లెట్ల వంటి 450కి పైగా ఔషధాలను అక్రమంగా దిగుమతి చేసుకుంటున్నారని పాకిస్థాన్ ప్రతిపక్షం ఆరోపించింది. ఈ నేపథ్యంలో ఈ విషయంపై దర్యప్తు చేపట్టాలని అధికారులను ఆదేశించారు పాక్ ప్రధాని ఇమ్రాన్ ఖాన్.
ఏం జరిగింది?
ఆర్టికల్ 370 రద్దు అనంతరం భారత్తో అన్ని సంబంధాలు రద్దు చేసుకుంటున్నట్లు ఆగస్టు 9న ప్రకటించింది పాక్ ప్రభుత్వం. కీలక ఔషధాలు, వాటి ముడి పదార్థాల దిగమతిని నిలిపివేస్తే అనేక మందికి ప్రాణముప్పు ఉందని ఔషధ పరిశ్రమలు పాక్ ప్రభుత్వాన్ని హెచ్చరించిన అనంతరం కొన్ని డ్రగ్స్ను మాత్రమే దిగుమతి చేసుకునేందుకు అనుమతించింది.
అయితే ఈ అవకాశాన్ని కొందరు దుర్వినియోగం చేస్తున్నారని, 450కిపైగా ఇతర ఔషధాలను భారత్ నుంచి దిగుమతి చేసుకుంటున్నారని పాక్ ప్రతిపక్షం పదే పదే ఆరోపణలు చేసింది. విచారణ చేపట్టాలని డిమాండ్ చేసింది. అందుకు సానుకూలంగా స్పందించారు ఇమ్రాన్.
పాక్ ఆరోగ్య మంత్రిత్వ శాఖ వివరాల ప్రకారం భారత్ నుంచి అనేక విటమిన్లు, డ్రగ్స్ను దిగుమతి చేసుకుంటున్నట్లు డాన్ మీడియా తెలిపింది. విటమిన్ బీ1, బీ2, బీ6, బీ12, డీ3, జింక్ సల్ఫేట్ మోనో హైడ్రేట్లు సహా అనేక ఔషధాలు భారత్ నుంచి దిగుమతి అవుతున్నట్లు పాక్ ఆరోగ్యమంత్రిత్వ శాఖ కార్యదర్శి సంతకం చేసిన పత్రంతో స్పష్టమైంది.
