జమ్ముకశ్మీర్కు ప్రత్యేక ప్రతిపత్తి కల్పించే అధికరణ 370 రద్దు చేసి ఆరు నెలలు గడిచినా.. పాకిస్థాన్ తన అక్కసును వెళ్లగక్కుతూనే ఉంది. కశ్మీర్ ప్రజలకు మద్దతు తెలుపుతూ.. ఆ దేశ పార్లమెంటులో ఏకగ్రీవంగా తీర్మానం ఆమోదించింది. జమ్ముకశ్మీర్కు ప్రత్యేక హోదాను ఉపసంహరించుకునే నిర్ణయాన్ని భారత్ వెనక్కి తీసుకోవాలని డిమాండ్ చేసింది.
ఏటా ఫిబ్రవరి 5న కశ్మీర్ సంఘీభావ రోజు నిర్వహించే కార్యక్రమంలో భాగంగా పాక్ పార్లమెంటు దిగువ సభలో తీర్మానం ఆమోదించింది. గత ఏడాది ఆగస్టు 5, అక్టోబర్ 31న తీసుకున్న నిర్ణయాలను, తీసుకొచ్చిన చట్టాలని వెనక్కి తీసుకోవాలని, కశ్మీర్లోని బలగాలను ఉపసంహరించుకోవాలని డిమాండ్ చేసింది. కశ్మీర్లో సాధారణ పరిస్థితులు కల్పించాలని కోరినట్లు ఆ దేశ అధికారిక రేడియో పేర్కొంది.
అదే మాటా..
కశ్మీరీ ప్రజలకు పాకిస్థాన్ రాజకీయ, నైతిక, దౌత్యపరమైన మద్దతు ప్రకటిస్తున్నట్లు తీర్మానం ద్వారా పునరుద్ఘాటించింది. తన తీర్మానాలకు అనుగుణంగా కశ్మీర్ సమస్యను శాంతియుతంగా పరిష్కరించాలని ఐక్యరాజ్య సమితి భద్రతా మండలిని కోరింది. కశ్మీర్లో పర్యటించేందుకు అంతర్జాతీయ సంస్థలు, పార్లమెంటేరియన్లు, మీడియాను అనుమతించాలని డిమాండ్ చేసింది. దాని వల్ల కశ్మీర్లోని మానవ హక్కుల పరిస్థితి ప్రపంచానికి తెలుస్తుందని పేర్కొంది.
ప్రత్యేక సమావేశం..
కశ్మీర్ సమస్యను పరిష్కరించేందుకు ముస్లిం దేశాల ఆధ్వర్యంలోని ఆర్గనైజేషన్ ఆఫ్ ఇస్లామిక్ కోఆపరేషన్ ప్రత్యేక సదస్సు ఏర్పాటు చేయాలని పిలుపునిచ్చింది.
కేంద్రంపై విమర్శలు..
కేంద్ర ప్రభుత్వంపై విమర్శలు చేసింది పాక్. భాజపా నేతలు యుద్ధం రావాలని కోరుకుంటున్నారని.. అలాంటి వ్యాఖ్యలను తాము తిరస్కరిస్తున్నట్లు తీర్మానంలో పేర్కొంది. అది ప్రాంతీయ శాంతి, సమగ్రతపై ప్రభావం చూపుతుందని తెలిపింది. భారత్ తీసుకోబోయే ఎలాంటి నిర్ణయాన్నైనా ఎదుర్కొనేందుకు పాకిస్థాన్ సిద్ధంగా ఉంటుందని స్పష్టం చేసింది.
ఇదీ చూడండి: మనిషి మెదడులో నాలుగు అంగుళాల 'ఏలికపాము'
