తైవాన్లో జరుగుతున్న భారీ కళా ప్రదర్శనలో కొత్త తరం పెయింటింగ్లు ప్రత్యేక ఆకర్షణగా నిలిచాయి. రెండు విభిన్న ఆసక్తులను మిళితం చేస్తూ అద్భుతాలను సృష్టించారు రష్యన్ చిత్రకారిణి ఓల్గా బెల్కా. సముద్రగర్భంలో ఆమె గీస్తున్న చిత్రాలను చూస్తుంటే మైమరిచిపోతాం.
ఓల్గాకు స్కూబా డైవింగ్, పెయింటింగ్ రెండింటిపైనా ఆసక్తి ఉంది. ఈ రెండింటినీ కలిపి కళాఖండాలకు ప్రాణం పోస్తున్నారు ఆ చిత్రకారిణి. దీనికే స్కూబా పెయింటింగ్ అంటూ నామకరణం చేశారు. ఇదేమీ అంత సులువైన పని కాదండోయ్. కానీ ఇలా చిత్రాలను గీస్తుంటే ధ్యానం చేసినట్టు ఉంటుందంటున్నారు ఓల్గా.
"మీరు నీటి అడుగున కూర్చున్నప్పుడు స్కూబా ద్వారా చాలా నెమ్మదిగా ఊపిరి పీల్చుకుంటారు. ఫలితంగా ధ్యానం చేసిన అనుభూతి కలుగుతుంది. నాతో పాటు వచ్చే మోడళ్లు కూడా అదే విధంగా భావిస్తారు. " - ఓల్గా బెల్కా, స్కూబా పెయింటర్
కొన్నిసార్లు 30 మీటర్ల లోతులో కూడా పెయింటింగ్ వేస్తానని ఆమె చెబుతున్నారు.
వండర్ల్యాండ్లో లాస్ట్ సప్పర్
ప్రఖ్యాత కళాకారుడు లియోనార్డో డావిన్సీ వేసిన 'ది లాస్ట్ సప్పర్' చిత్రాన్ని 'అలీస్ ఇన్ వండర్ లాండ్'తో కలిపి ఓ కొత్త కళాఖండానికి రూపమిచ్చారు తైవాన్ చిత్రకారిణి చావో విచూ. ప్రస్తుతం మనం భోజనం చేసే పద్ధతిపై వ్యంగ్యంగా ఈ పెయింటింగ్ వేశానంటున్నారు చావో. ఇందులో ఓ వ్యక్తి మొబైల్ చూస్తూ భోజనం చేస్తుంటారు.
"ప్రస్తుతం చాలా మంది భోజనం చేసేటప్పుడు తమ ఫోన్లను చేతిలో పట్టుకుని కూర్చుంటారు. ఈ పెయింటింగ్లో కూడా డావిన్సీ ఫోన్ పట్టుకుని ఉంటారు. ఆ పక్కన ఉన్న చిన్న పంది పిల్లలు సెల్ఫీ కర్రను పట్టుకుని ఉంటాయి. మన భోజన అలవాట్లకు ఇదో విమర్శనాత్మక చిత్రం."
-చావో విచూ, పెయింటర్
ఇదీ చూడండి: అధ్యక్ష ఎన్నికల రేసులో జో బిడెన్ జోరు
