ప్రపంచవ్యాప్తంగా కరోనా మహమ్మారి సృష్టిస్తున్న కల్లోలం.. ఎవరెస్టు శిఖరాన్ని కూడా తాకింది. నార్వేకు చెందిన ఎర్లెండ్ నెస్ అనే పర్వాతారోహకుడికి ఎవరెస్ట్ బేస్ క్యాంపులో కొవిడ్ సోకినట్లు నిర్ధరణ అయింది. దాంతో అతణ్ని హెలికాప్టర్ ద్వారా కాఠ్మాండూలోని ఓ ఆస్పత్రికి అధికారులు తరలించారు.
ఎవరెస్టు పర్వతంపై కరోనా కేసు వెలుగు చూడటం ఇదే తొలిసారి కావటం గమనార్హం.
శుక్రవారం నిర్వహించిన పరీక్షల్లో తనకు కొవిడ్ పాజిటివ్గా తేలినట్లు ఎర్లెండ్ నెస్ తెలిపారు. అంతకుముందు.. గురువారం నిర్వహించిన పరీక్షల్లో నెగెటివ్గానే ఉన్నట్లు చెప్పారు. ఎర్లెండ్నెస్కు కరోనా సోకిన నేపథ్యంలో.. తక్షణమే బేస్ క్యాంపులోని మిగతా వారికి పరీక్షలు చేపట్టకపోతే.. వందలాది మంది ఇతర పర్వాతారోహకులకు వైరస్ సోకుతుందని పర్వాతారోహక బృందానికి మార్గదర్శకుడైన ఆస్ట్రియన్ లుకాస్ ఫర్టెన్బాచ్ హెచ్చరించారు. తద్వారా.. పర్వాతారోహణకు అనుకూలమైన మే నెల వృథాగా మారుతుందని అభిప్రాయపడ్డారు.
"బేస్ క్యాంపులోని అందరికీ పరీక్షలు నిర్వహించాలి. ప్రతి ఒక్కరికి పరీక్షలు జరపడం సహా ప్రతి బృందాన్ని ఐసొలేట్ చేయాలి. వారి మధ్య ఎలాంటి కాంటాక్ట్స్ లేకుండా చూడాలి. తక్షణమే ఈ చర్యలు చేపట్టాలి. లేదంటే చాలా నష్టం ఎదురవుతుంది. కొన్నివారాలుగా ఎర్లెండ్ నెస్ మిగతా వారితో కలిసే ఉన్నాడు."
-ఆస్ట్రియన్ లుకాస్ ఫర్టెన్బాచ్, పర్వాతారోహక బృంద మార్గదర్శకుడు
అయితే.. ఎవరెస్ట్పై ప్రస్తుతం ఎలాంటి యాక్టివ్ కేసులు లేనట్లు నేపాల్కు చెందిన ఓ అధికారి తెలిపారు.
కరోనా నేపథ్యంలో గతేడాది ఎవరెస్టు పర్వాతారోహణను నిలిపివేసిన నేపాల్ ప్రభుత్వం.. ఈ ఏడాదే తిరిగి ప్రారంభించింది.
ఇదీ చూడండి: భారత్కు టీకా సాయంలో పంతం వీడని అమెరికా!
ఇదీ చూడండి: భారత్ను ఆదుకోవాలని బైడెన్కు సెనేటర్ల వినతి
