భారత్​కు పాక్ గగనతలాన్ని మూసేయలేదు: ఖురేషీ

భారత దేశానికి తమ గగనతలాన్ని మూసివేయలేదని పాకిస్థాన్ విదేశాంగమంత్రి షా మహమూద్‌ ఖురేషీ స్పష్టం చేశారు. పూర్తి సంప్రదింపులు, చర్చలు జరిపి ప్రతి అంశాన్నీ పరిశీలించిన తరువాతే ఏ నిర్ణయమైనా తీసుకుంటామని స్పష్టం చేశారు. తుది నిర్ణయం పాక్​ ప్రధాని ఇమ్రాన్​ఖాన్ చేతిలో ఉందని ఖురేషీ వెల్లడించారు.

భారతదేశానికి తమ గగనతలాన్ని మూసివేయలేదని, ఇంకా ఆ విషయంపై ఎలాంటి నిర్ణయం తీసుకోలేదని పాకిస్థాన్ విదేశాంగమంత్రి షా మహమూద్‌ ఖురేషీ స్పష్టం చేశారు. ఈ అంశంపై అన్ని కోణాలను పరిశీలించి.. సంప్రదింపులు, చర్చలు జరిపిన తరువాతే ఏ నిర్ణయమైనా తీసుకుంటామని ఆయన పేర్కొన్నారు.

భారతదేశ విమానాలు ప్రయాణించకుండా... పాక్ తన గగనతలాన్ని మూసివేసిందన్న వార్తలను ఖురేషీ కొట్టిపారేశారు. ఇటీవలే జరిగిన కేంద్ర మంత్రివర్గ​ సమావేశంలో ఈ విషయం చర్చకు వచ్చిందని.. అయితే తుది నిర్ణయం మాత్రం ప్రధానమంత్రి ఇమ్రాన్ ​ఖాన్ తీసుకుంటారని ఖురేషీ స్పష్టం చేశారు.

పొంతనలేని ప్రకటనలు..

పాక్​ శాస్త్ర,సాంకేతిక శాఖ మంత్రి ఫవాద్​ చౌదరి ట్విట్టర్​ వేదికగా భారత్​పై తన అక్కసు వెళ్లగక్కారు. భారతదేశానికి.. తమ గగనతలాన్ని మూసివేసే అంశాన్ని పాక్​ ప్రభుత్వం పరిశీలిస్తోందని తెలిపారు.

ఈ ప్రకటన వెలువడిన కొన్ని గంటలకే... భారత్​కు తమ గగనతలాన్ని మూసివేయలేదని పాక్ విదేశాంగమంత్రి ప్రకటించడం గమనార్హం.

అప్పటి నుంచే మొదలైంది..

బాలాకోట్​ ఉగ్రస్థావరాలపై భారత వాయుసేన దాడి చేసిన తర్వాత ఫిబ్రవరిలో తన వాయు మార్గాన్ని పూర్తిగా నిలిపేసినట్లు పాక్​ ప్రకటించింది. ఆ తర్వాత మే 15 నుంచి మరో 15 రోజులు ఈ నిషేధాన్ని కొనసాగించింది.

ఆర్టికల్​ 370 రద్దుతో పరిస్థితులు మరింత ఉద్రిక్తంగా మారాయి. ఈ తరుణంలోనే భారత్​తో దౌత్య, వాణిజ్య సంబంధాలను పాక్​ తెంచుకుంది. బస్సు, రైలు సర్వీసులను కూడా రద్దు చేసింది.

ఇదీ చూడండి: తమిళనాట 'ఐఎస్' ఉగ్రకలకలం... ఎన్​ఐఏ సోదాలు