పాకిస్థాన్ స్టాక్ ఎక్స్ఛేంజిపై ఉగ్రదాడితో తమకెలాంటి సంబంధం లేదని బలూచిస్థాన్ లిబరేషన్ ఆర్మీ (బీఎల్ఏ) స్పష్టం చేసింది. ఈ మేరకు బీఎల్ఏ అధికార ప్రతినిధి ఆజాద్ బలూచ్ ప్రకటన విడుదల చేశారు.
దాడిపై ఆసంతృప్తి వ్యక్తం చేశారు ఆజాద్. బీఎల్ఏ పేరు చెప్పుకొని దాడికి పాల్పడినవారిని సంస్థ నుంచి ఎప్పుడో బహిష్కరించామని తెలిపారు.
"పాక్ స్టాక్ ఎక్స్ఛేంజిపై దాడి చేసిన యువకులు బీఎల్ఏకు చెందిన వారు కాదు. ప్రజలపై దాడులు చేయటం మా వ్యుహంలో భాగం కాదు."
- ఆజాద్ బలూచ్
కరాచీలోని పాకిస్థాన్ స్టాక్ ఎక్స్ఛేంజిపై నలుగురు సాయుధులు తుపాకులు, గ్రనేడ్లతో దాడి చేయడం సంచలనం సృష్టించింది. ఈ ఘటనలో నలుగురు భద్రతా సిబ్బంది, ఓ పోలీస్ అధికారి, ఇద్దరు పౌరులు ప్రాణాలు కోల్పోయారు. నలుగురు ఉగ్రవాదులు కాసేపటికే హతమయ్యారు. ఇది తమ పనేనని బీఎల్ఏ ప్రకటించినట్లు తొలుత వార్తలు వచ్చాయి.
స్వతంత్రం కోసం..
బలూచిస్థాన్ లిబరేషన్ ఆర్మీ కొన్నేళ్లుగా 'స్వతంత్రం' కోసం పోరాడుతోంది. అపార సహజవాయు నిక్షేపాలున్న బలూచిస్థాన్ రాష్ట్రాన్ని ప్రత్యేక దేశంగా ప్రకటించాలని డిమాండ్ చేస్తోంది. ఈ పోరాటంలో భాగంగా గత కొన్ని ఏళ్లుగా కరాచీలో వరుస దాడులకు పాల్పడుతున్నారు బీఎల్ఏ సభ్యులు. 2018 నవంబర్లో చైనా దౌత్య కార్యాలయంపై చేసిన దాడిలో ఇద్దరు మరణించారు.
ఇదీ చూడండి: పాక్ స్టాక్ మార్కెట్పై దాడి- బలూచ్ ముష్కరుల పనే
