కాలపానీ సమస్యను దౌత్య మార్గంలోనే పరిష్కరించుకుంటామని నేపాల్ ప్రధాని కేపీ శర్మ ఓలీ స్పష్టం చేశారు. చారిత్రక వాస్తవాలు, పత్రాల ఆధారంగా చర్చలు జరిపి తమ భూభాగాలను తిరిగి పొందుతామని తెలిపారు. ఆ దేశ పార్లమెంటులో అడిగిన ఓ ప్రశ్నకు సమాధానంగా ఈ విషయాలను వెల్లడించారు ఓలీ.
"భారత్తో చర్చల ద్వారా మా భూభాగాలను తిరిగి పొందుతాం. కాళీ ఆలయాన్ని నిర్మించి కృత్రిమ కాళీ నదిని సృష్టించింది భారత్. కాలపానీలో సైన్యాన్ని మోహరించి నేపాల్ భూభాగాలను ఆక్రమించింది."
- కేపీ శర్మ ఓలీ, నేపాల్ ప్రధాని
రహదారి ప్రారంభంతో..
భారత్కు వ్యూహాత్మకంగా కీలకమైన రహదారిని రక్షణ మంత్రి రాజ్‌నాథ్ సింగ్ మే 8న ప్రారంభించిన తరువాత భారత్, నేపాల్ మధ్య సంబంధాలు దెబ్బతిన్నాయి. 80 కి.మీ పొడవైన ఈ రహదారి ఉత్తరాఖండ్‌లోని ధార్చులాతో లిపులేఖ్ కనుమను అనుసంధానిస్తుంది.
రహదారి ప్రారంభోత్సవంపై నేపాల్ తీవ్రంగా స్పందించింది. ఇది నేపాల్ భూభాగం నుంచి వెళుతుందని పేర్కొంది. ఈ ప్రాంతం 1962కు ముందు నేపాల్ అధీనంలోనే ఉందని అక్కడి అధికారులు చెబుతున్నారు. చైనాతో యుద్ధ సమయంలో ఈ తాత్కాలిక అవసరాల కోసం ఈ ప్రాంతంలో భారత్ బలగాలను మోహరించి.. అలాగే కొనసాగించారని ఆరోపించారు.
కొత్త మ్యాపునకు ఆమోదం..
కాలాపానీ, లిపులేఖ్, లింపియాధురాలను తమ భూభాగంలోనివిగా నేపాల్ వాదనలకు దిగింది. అంతేకాకుండా ఈ ప్రాంతాలను తమ భూభాగంలో కలిపి కొత్త జాతీయ పటాన్ని రూపొందించింది. ఇందుకు సంబంధించిన రాజ్యాంగ సవరణకు ఆ దేశ పార్లమెంటు ఆమోద ముద్ర వేసింది. రాష్ట్రపతి ఆమోదం తర్వాత నేపాల్ జాతీయ చిహ్నంలోనూ ఇదే మ్యాప్ కనిపిస్తుంది.
యోగి సూచనలపైనా..
టిబెట్ చేసిన తప్పు నేపాల్ చేయవద్దని యూపీ సీఎం యోగి ఆదిత్యనాథ్ చేసిన సూచనలపైనా ఓలీ స్పందించారు. యోగి ఈ విషయాలపై మాట్లాడటం సముచితం కాదని పేర్కొన్నారు.
"నేపాల్ను ఈ విధంగా హెచ్చరించటం సముచితం కాదు. యూపీ ముఖ్యమంత్రి ఇలా మాట్లాడి ఉండాల్సింది కాదు. ఇది విచారకరం." అని ఓలీ వ్యాఖ్యానించారు.
ఈపీజీ నివేదిక..
భారత్, నేపాల్కు సంబంధించి ఎమినెంట్ పర్సన్స్ గ్రూప్ (ఈపీజీ) రూపొందించిన సంయుక్త నివేదికను స్వీకరించేందుకు భారత్ సిద్ధంగా లేదని ఓలీ ఆరోపించారు. నేపాల్ సిద్ధంగానే ఉన్నప్పటికీ.. రెండు ప్రభుత్వాలు స్వీకరించనిదే దీనికి అర్థం లేదని పేర్కొన్నారు.
ఇదీ చూడండి: సరిహద్దు సమస్యకు సామరస్యంగానే పరిష్కారం: చైనా
