నేపాల్ పార్లమెంట్ను పునరుద్ధరించాలని ఆ దేశ సుప్రీం కోర్టు తీర్పు వెలువరించిన క్రమంలో రాజకీయాలు రసవత్తరంగా మారాయి. ప్రధాని కేపీ శర్మ ఓలి రాజీనామాకు డిమాండ్లు పెరిగాయి. అయితే... ఓలి ఇప్పట్లో రాజీనామా చేయరని, రెండు వారాల్లో సమావేశం కానున్న పార్లమెంట్ను ఎదుర్కొనేందుకు సన్నద్ధమవుతున్నట్లు ఆయన మీడియా సలహాదారు సూర్య తాపా తెలిపారు.
" సుప్రీం కోర్టు తీర్పు వివాదాస్పదం. ఏదేమైనా, దానిని అంగీకరించాలి, అమలు చేయాలి. ఈ నిర్ణయం రాజకీయ సమస్యలకు ఎటువంటి పరిష్కారం ఇవ్వదు. అలాగే భవిష్యత్తులో దీని ప్రభావాలు కనిపిస్తాయి. సర్వోన్నత న్యాయస్థానం తీర్పు.. అస్థిరతకు మరింత ఆజ్యం పోస్తుంది. అలాగే.. పవర్ ప్లేకు మార్గం సుగమం చేస్తుంది. కోర్టు తీర్పును అమలు చేయడానికి ప్రధాని ప్రతినిధుల సభను ఎదుర్కొంటారు. కానీ, ఇప్పుడే రాజీనామా చేయరు. "
- సూర్య తాపా, ఓలి మీడియా సలహాదారు
కోర్టు తీర్పును అనుసరించి తన పదవికి రాజీనామా చేయాలని ప్రధాని ఓలిపై ఒత్తిడి పెరుగుతున్న సమయంలో ఈ మేరకు తాపా స్పందించటం ప్రాధాన్యం సంతరించుకుంది. సూర్య తాపా వ్యాఖ్యలను సమర్థించారు ఓలి ప్రధాన సలహాదారు బిష్ణు రిమాల్. కోర్టుల నిర్ణయాలను అందరూ అంగీకరించాలన్నారు. అయినప్పటికీ రాజకీయ సమస్యలకు అవి ఎలాంటి పరిష్కారం చూపవని అభిప్రాయపడ్డారు.
తీర్పును స్వాగతించిన నేపాల్ మీడియా..
ప్రతినిధుల సభను తిరిగి పునరుద్ధరించాలని సుప్రీం కోర్టు ఇచ్చిన తీర్పును నేపాల్కు చెందిన చాలా మీడియా సంస్థలు స్వాగతించాయి. ప్రజాస్వామ్య విలువలను, రాజ్యాంగాన్ని న్యాయస్థానం కాపాడిందని కొనియాడాయి. 'తాజా తీర్పుతో సుప్రీం కోర్టు మరోమారు ప్రజల పక్షాన నిలిచింది. స్వతంత్ర న్యాయవ్యవస్థ భావనను తిరిగి స్థాపించింది.' అని కాఠ్మాండూ పోస్ట్ తన సంపాదకీయంలో రాసుకొచ్చింది.
ఓలి రాజీమానాకు డిమాండ్..
మరోవైపు.. ఇన్నాళ్లు ప్రధాని ఓలీ, ప్రచండ, మాధవ్ కుమార్తో సమన్వయంగా వ్యవహరించిన నేపాల్ కమ్యూనిస్ట్ పార్టీ ఉపాధ్యక్షుడు బామ్దేవ్ గౌతమ్.. తాజాగా ఓలి తన పదవికి రాజీనామా చేయాలని కోరారు. 'ప్రధాన మంత్రి తీసుకున్న నిర్ణయం రాజ్యాంగ విరుద్ధమని కోర్టు తీర్పు ద్వారా తేలింది. ఈ క్రమంలో ఆయన వెంటనే రాజీనామా చేయాలి' అని పేర్కొన్నారు. ప్రజలకు ఓలి క్షమాపణలు చెప్పాలని డిమాండ్ చేశారు దహల్ నేపాల్ పార్టీ ఇంఛార్జి బీమ్ రావల్.
ఇదీ చూడండి: ఓలికి ఎదురుదెబ్బ- ప్రతినిధుల సభ పునరుద్ధరణ
