పౌరసత్వ చట్ట సవరణతో ఈశాన్య రాష్ట్రాల్లో చెలరేగుతున్న నిరసన సెగలు భారత్-జపాన్ వార్షిక సదస్సుపై ప్రభావం చూపాయి. ప్రధాని నరేంద్ర మోదీ, జపాన్ ప్రధాని షింజో అబే మధ్య గువాహటి వేదికగా జరగాల్సిన సమావేశం వాయిదా పడింది.
ఈ నెల 15 నుంచి 17వ తేదీ మధ్య ఇరువురు నేతలు భేటీ కావాల్సి ఉంది. అయితే ఇరుదేశాలకు అనుకూలమైన మరో రోజున సమావేశం నిర్వహించేందుకు భారత్-జపాన్ అంగీకరించాయి. ఈ మేరకు విదేశాంగ అధికార ప్రతినిధి రవీశ్ కుమార్ ప్రకటన విడుదల చేశారు. వచ్చే ఏడాది ద్వైపాక్షిక భేటీ జరగొచ్చని తెలిపారు.
"జపాన్ ప్రధాని షింజో అబే భారత్ పర్యటన వాయిదా పడింది. భవిష్యత్లో పరస్పర అనుకూలమైన రోజున ప్రధాని మోదీతో అబే సమావేశమవుతారు."
- రవీశ్ కుమార్, విదేశాంగశాఖ అధికార ప్రతినిధి
భారత్-జపాన్ ద్వైపాక్షిక సమావేశం డిసెంబరు 15 నుంచి 17 వరకు జరగనున్నట్లు విదేశాంగశాఖ గతవారమే ప్రకటించింది. అయితే ఎక్కడ జరగబోయేది మాత్రం స్పష్టం చేయలేదు. అయినప్పటికీ గువాహటిలో ప్రధాని మోదీ-షింజో అబేల భేటీకి చురుగ్గా పనులు జరుగుతున్నట్లు వార్తలొచ్చాయి. కానీ, వివాదాస్పద పౌరసత్వ చట్ట సవరణ బిల్లుకు పార్లమెంట్ ఆమోదం తెలిపినప్పటి నుంచి ఈశాన్య రాష్ట్రాల్లో నిరసనలు మిన్నంటాయి.
ఈ నేపథ్యంలో గువాహటిలో తాజా పరిస్థితులతో పాటు సదస్సు పనులను సమీక్షించేందుకు జపాన్ బృందం బుధవారమే అక్కడికి చేరుకుంది. ప్రస్తుత పరిస్థితుల్లో షింజో అబే భారత్లో పర్యటించడం కుదరని విదేశాంగ శాఖకు వివరించింది. ఫలితంగా జపాన్ ప్రధాని భారత పర్యటన వాయిదా పడింది.
