చైనాలో లేకిమా తుపాను బీభత్సం సృష్టిస్తోంది. భారీ వర్షాలతో జన జీవనం స్తంభించింది. 187 కిలోమీటర్ల వేగంతో వీస్తున్న ప్రచండ గాలులతో తూర్పు చైనా వణికిపోతోంది. భారీ వర్షాల కారణంగా 33 మంది మరణించారు. మరో 16 మంది గల్లంతయ్యారు.
జెజియాంగ్ రాష్ట్రంలోని వెన్జౌ నగరంలో కొండచరియలు విరిగి పడిన ఘటనలో ఎక్కువ మంది ప్రాణాలు కోల్పోయినట్లు అధికారులు తెలిపారు. ఈ ప్రమాదంలో 18 మంది మృతి చెందారు. పలువురి ఆచూకీ గల్లంతయింది. జెజియాంగ్, జియాంగ్సు రాష్ట్రాల్లో తుపాను ప్రభావం అధికంగా ఉన్నట్లు అధికారులు వెల్లడించారు.
వర్షాల కారణంగా షాంఘై డిస్నీల్యాండ్ మూతపడింది. జెజియాంగ్ రాష్ట్రంలో సుమారు 3,200 విమాన సర్వీసులు రద్దయ్యాయి. పలు రైళ్ల సర్వీసును నిలిపివేశారు.
1000 మందితో కూడిన విపత్తు నిర్వహణ బృందాలు సహా 150 అగ్నిమాపక యంత్రాలు, 153 పడవల సాయంతో సహాయక చర్యలు చేపడుతున్నారు. సుమారు 10 లక్షల మందిని సురక్షిత ప్రాంతాలకు తరలించారు.
ఇదీ చూడండి: యెమెన్లో తారస్థాయికి ఘర్షణలు.. 40 మంది మృతి
