అఫ్గానిస్థాన్ రాజధాని కాబూల్లో ఉగ్రదాడి జరిగింది. అఫ్గాన్ మాజీ అధ్యక్షుడు హమిద్‌ కర్జాయి, ముఖ్య కార్యనిర్వాహణాధికారితో పాటు పలువురు రాజకీయ నేతలు ఓ కార్యక్రమానికి హాజరయ్యారు. ఆ ప్రాంతానికి సమీపంలోనే ఈ ఘటన చోటుచేసుకుంది. అదే ప్రాంతంలో బాంబు పేలుళ్లూ సంభవించాయి. ఉగ్రమూకల దాడిలో ఇప్పటివరకు ఎంతమంది చనిపోయారన్న విషయంపై అధికారులు స్పష్టతనివ్వలేదు. ఈ దాడుల్లో ముగ్గురు మరణించారు. మరో 32 మందికి గాయాలయ్యాయి.
బాధితుల సంఖ్యపై పూర్తి స్పష్టత రాలేదని తెలిపారు అఫ్గాన్ వైద్య మంత్రి మొహాయ్బుల్లా జైర్. అంతకుముందు మొహమ్మద్‌ అసీమ్‌ అనే అధికారి... 7 మంది మరణించగా...10 మంది గాయపడ్డారని మీడియాకు వెల్లడించారు. క్షతగాత్రులను భద్రతా సిబ్బంది, సహాయక బృందాలు ఆస్పత్రికి తరలించి చికిత్స అందిస్తున్నారు. కార్యక్రమానికి వందలాది మంది ప్రజలు హాజరయ్యారని అధికారులు తెలిపారు.
కారకులు తెలియలేదు...
ఈ ఘటనకు పాల్పడిన ఉగ్రసంస్థ ఏదో ఇప్పటి వరకు తెలియలేదు. బాంబు దాడికి సంబంధించి ఒకరిని అరెస్టు చేసినట్లు అఫ్గాన్ అంతర్గత వ్యవహారాల మంత్రిత్వ శాఖ ప్రతినిధి నుస్రత్‌ రహిమి తెలిపారు.
