భారత్, నేపాల్ మధ్య కాలాపానీ వివాదం ద్వైపాక్షిక చర్చల ద్వారా పరిష్కరమవుతుందని... ఆ విషయంలో తనకు విశ్వాసం ఉన్నట్లు అభిప్రాయపడ్డారు నేపాల్ విదేశాంగ మంత్రి ప్రదీప్ కుమార్ గ్యావాలి. రెండు దేశాల మధ్య స్నేహభావ సంబంధాలు సుదీర్ఘ కాలం కొనసాగాలని ఆకాంక్షించారు.
"ఈ సమస్యను పరిష్కరించడానికి విశ్వాసంతో చర్చలు జరపడమే ఏకైక మార్గమని మేము ఎప్పుడూ చెబుతున్నాం. అనవసరమైన ఉద్రేకం, పక్షపాతం లేకుండా నేపాల్ సరిహద్దు సమస్యలను సంభాషణల ద్వారా పరిష్కరించాలని కోరుకుంటుంది" అని గ్యావాలి ఓ పత్రికకు ఇచ్చిన ఇంటర్వ్యూలో చెప్పారు. అయితే నేపాల్ తమవని పేర్కొన్న లింపియాధురా, లిపులేఖ్ గురించి ఆయన ప్రస్తావించలేదు.
మే 8న ఉత్తరాఖండ్‌లోని దర్చులా-లిపులేఖ్ కనుమ అనుసంధానించే 80 కిలోమీటర్ల పొడవైన కీలకమైన రహదారి నిర్మాణాన్ని రక్షణ మంత్రి రాజ్‌నాథ్ సింగ్ ప్రారంభించారు. రహదారి ప్రారంభోత్సవంపై నేపాల్ తీవ్రంగా స్పందించింది. ఈ రోడ్డు నేపాల్ భూభాగం గుండా వెళ్తోందని పేర్కొంది. అయితే రహదారి పూర్తిగా తమ భూభాగంలోనే ఉందని నేపాల్ వాదనను తిరస్కరించింది భారత్.
ఇదీ చూడండి: కాలాపానీ మాదేనంటూ నేపాల్ కొత్త మ్యాప్
