ప్రపంచమంతా ఇప్పుడు డిజిటల్ మయం. ఒక్క రోజు చరవాణి వినియోగించకపోతే జీవితం గడవదనే పరిస్థితి. ముఖ్యంగా ఈ తరం చిన్నారుల్లో చాలా మంది చేతిలో ఫోన్లు లేకపోతే భోజనం కూడా చేయడం లేదు. మరి ఈ డిజిటల్ పరికరాల దుష్ప్రభావాల నుంచి వారిని రక్షించాలంటే? ఈ ప్రశ్నకు సమాధానం కనుగొంది జర్మనీ. అదే... 'మీడియా స్కౌట్.'
జర్మనీలోని మూడింట రెండోవంతు చిన్నారులకు 11 ఏళ్లకే సొంత ఫోన్లు ఉన్నాయి. అలాంటి వారికి సామాజిక మాధ్యమాలపై అవగాహన కల్పించడం ఈ మీడియా స్కౌట్ లక్ష్యం. విద్యా బోధనలో ఈ కార్యక్రమాన్ని ఒక భాగం చేశారు.
వాట్సప్ వంటి మెసేజింగ్ యాప్లలో ఎలాంటి సందేశాలు పంపొచ్చు...? ఎవరైనా అభ్యంతరకర పోస్టులు చేసినా, మెసేజ్లు పెట్టినా ఏం చేయాలి? సైబర్ వేధింపులను ఎదుర్కోవడం ఎలా? ఇలాంటి అంశాలపై విద్యార్థులకు శిక్షణ అందిస్తుంది మీడియా స్కౌట్.
"అందరి జీవితాల్లో సోషల్ మీడియా ఒక భాగమైపోయింది. వీటితో జీవితం ఎలా ఉంటుందనే దానిపై విద్యార్థులకు మీడియా స్కౌట్ వివరిస్తుంది. చరవాణిల నుంచి దూరంగా ఉండటం వల్ల కలిగే ఉపయోగాలను చెబుతుంది."
--- వెర సర్వటి, మీడియా స్కౌట్ గైడెన్స్ కౌన్సిలర్
మీడియా స్కౌట్ శిక్షణ పొందినవారికి 8వ తరగతిలో ప్రత్యేక పరీక్ష నిర్వహిస్తారు. అందులో ఉత్తీర్ణులైనవారికి 'మొబైల్ లైసెన్స్' లభిస్తుంది. ఆ లైసెన్స్ ఉంటే నిర్ణీత సమయాల్లో పాఠశాలల్లోనే ఫోన్ ఉపయోగించుకోవచ్చు.
2011లో ప్రారంభమైన మీడియా స్కౌట్ కార్యక్రమంలో 766 పాఠశాలలు చేరాయి. 3 వేల 120 మంది విద్యార్థులు శిక్షణ పొందారు. 1,500 మంది ఉపాధ్యాయులు మీడియా స్కౌట్ గైడెన్స్ కౌన్సిలర్గా ఉండి పిల్లలకు వివిధ అంశాలపై అవగాహన కల్పించారు.
