చైనాతో చర్చలు : బీజింగ్​లో జై శంకర్​

చైనాలో మూడు రోజుల పర్యటన నిమిత్తం బీజింగ్​ చేరుకున్నారు భారత విదేశాంగ మంత్రి జై శంకర్​. ఇరుదేశాల మధ్య ద్వైపాక్షిక సంబంధాలు మరింత బలోపేతమయ్యేలా డ్రాగన్​ దేశ ప్రతినిధులతో చర్చలు జరపనున్నారు. కశ్మీర్ విషయంలో భారత్​ -పాకిస్థాన్​ మధ్య ఉద్రిక్తతల నడుమ జై ​శంకర్​​ పర్యటన అత్యంత ప్రాధాన్యత సంతరించుకుంది.

డ్రాగన్​ దేశంలో మూడు రోజుల పర్యటన కోసం బీజింగ్​ చేరుకున్నారు భారత విదేశాంగ మంత్రి జై శంకర్​. పలు రంగాల్లో ఇరుదేశాల మధ్య పరస్పర సహకారం మరింత బలోపేతంతో పాటు రెండవ ఉన్నత స్థాయి సమావేశాల్లో పాల్గొననున్నారు​. సోమవారం నుంచి మూడు రోజుల పాటు జైశంకర్​ పర్యటన సాగనుంది.

ఈ ఏడాది చైనా అధ్యక్షుడు భారత్​లో పర్యటించనున్నారు. మోదీతో జిన్​పింగ్​ ద్వైపాక్షిక చర్చల వివరాలపైనా ఇరుదేశాల ప్రతినిధులు చర్చలు జరిపే అవకాశముంది.

భాజపా సర్కారు రెండోసారి అధికారం చేపట్టిన తర్వాత చైనాలో పర్యటిస్తోన్న తొలి భారత మంత్రిగా జై శంకర్ నిలిచారు​. ఆర్టికల్​ 370 రద్దుకు ముందే విదేశాంగ మంత్రి పర్యటన ఖరారైనట్లు అధికారులు తెలిపారు.

కశ్మీర్​ విషయం

కశ్మీర్​ విషయంలో భారత్​తో పాక్ దౌత్య సంబంధాలు రద్దు చేసుకున్న తర్వాత జైశంకర్​ చైనాలో పర్యటించడం ప్రాధాన్యం సంతరించుకుంది. ఇటీవల కశ్మీర్​పై భారత్​ నిర్ణయాన్ని చైనా వ్యతిరేకించింది. పాక్​ విదేశాంగ మంత్రి మహమూద్​ ఖురేషి చైనా పర్యటనకు వెళ్లి కశ్మీర్​పై ఐరాసలో డ్రాగన్​ మద్దతు కోరారు.