సంపూర్ణ ప్రజాస్వామ్యమే లక్ష్యంగా గత ఏడు నెలలుగా నిరసనలతో హాంకాంగ్ అట్టుడుకిపోతోంది. ఈ నేపథ్యంలో హాంకాంగ్ విశ్వవిద్యాలయానికి చెందిన 30 మంది పూర్వ విద్యార్థులు.. నిరసనకారులకు మద్దతుగా ఆ దేశ పౌరులకు గళం వినిపించేలా ఓ వినూత్న పద్ధతిని ఎంచుకున్నారు. అదే నృత్యరూప ప్రదర్శన.
ఇందులో విద్యార్థులు గత ఏడునెలలుగా జరిగిన నిరసనల ఉదంతాన్ని వీడియోలో చిత్రీకరించారు. నిరసనకారులపై జరుగుతున్న ప్రభుత్వ అరాచకాలు, పోలీసుల క్రూర చర్యలు, చితికిపోయిన నిరసనకారుల జీవితాలను నృత్య రూపంలో ప్రదర్శించారు.
ఈ నృత్యరూప ప్రదర్శన ద్వారా ప్రజల్లో ఐక్యమత్యం పెంపొందించి సామాజిక ఉద్యమంలో వారిని భాగస్వాములను చేయడానికి దోహదపడుతుందని అభిప్రాయపడ్డారు.
"గత ఏడునెలలుగా జరుగుతున్న హాంకాంగ్ నిరసనకారులపై జరుగుతున్న అకృత్యాలను ఈ విడియోలో చిత్రీకరించాం. ఈ వీడియో వైరల్గా మారుతుందని ఆశిస్తున్నాం. దీని ద్వారా ప్రజల్లో అవగాహన పెరుగుతుందని భావిస్తున్నాం."
- హాంకాంగ్ విశ్వవిద్యాలయం పూర్వ విద్యార్థి
హాంకాంగ్లోని హింసాత్మక ఘటనలు చోటుచేసుకున్న వివిధ ప్రదేశాల్లో ఈ వీడియోను చిత్రీకరించారు. నల్లటి దుస్తులతో ముఖానికి గ్యాస్ మాస్కులు ధరించి చేతిలో మందపాటి చెక్క కర్రలు, షీల్డ్లు పట్టుకుని హావాభావాలను ప్రదర్శిస్తూ నృత్యాలు వేశారు.
మరోవైపు ఈ వీడియో సామాజిక మాధ్యమాల్లో వైరల్ అవుతోంది. యూట్యూబ్, ఫేస్బుక్ పేజీలో పోస్ట్ చేయగానే లక్షా 50వేల వీక్షణలను పొందింది.
ఇదీ చూడండి : హాంకాంగ్లో మళ్లీ నిరసనలు- బాష్పవాయువు ప్రయోగం
