కరోనా నుంచి కోలుకున్న వారిలో రోగ నిరోధక శక్తి సుదీర్ఘకాలం ఉంటుందని ఓ అధ్యయనంలో తేలింది. ఫలితంగా.. మళ్లీ ఎనిమిది నెలల వరకు వైరస్ బారిన పడకుండా ఉండగలుగుతారని నిర్ధరణ అయింది. ఆస్ట్రేలియాలోని మోనాష్ విశ్వవిద్యాలయ పరిశోధకులు చేసిన ఓ అధ్యయనంలో ఈ విషయాలు వెల్లడయ్యాయి. వీరి పరిశోధన ఫలితాలను 'ఇమ్యూనాలజీ' జర్నల్ ప్రచురించింది.
రోగ నిరోధక వ్యవస్థలోని 'మెమొరీ బీ కణాలు' వైరస్ దాడికి గురైన పరిస్థితులు గుర్తించుకని, మళ్లీ కరోనా బారిన పడకుండా యాంటీబాడీలను ఉత్పత్తి చేస్తాయని పరిశోధకులు చెబుతున్నారు. 25 మంది కొవిడ్ రోగుల్లో 4వ రోజు నుంచి 242 రోజుల మధ్య 36 రక్తనమూనాలు సేకరించి శాస్త్రవేత్తలు ఈ అధ్యయనం చేపట్టారు. కొవిడ్ వ్యాక్సిన్ తీసుకున్నప్పటికీ.. రోగ నిరోధక శక్తి అత్యంత త్వరగా తగ్గిపోతుందన్న ఆందోళనల నేపథ్యంలో ఈ పరిశోధన ఫలితాలు వెలువడటం గమనార్హం.
20 రోజుల అనంతరం యాంటీబాడీల ప్రభావం తగ్గుతున్నట్లు పరిశోధకులు ఈ అధ్యయనంలో తేల్చారు. కానీ, మెమొరీ బీ కణాల సాయంతో రోగ నిరోధక శక్తి 8 నెలల వరకు ఉంటుందని స్పష్టం చేశారు. ఈ ఫలితాల బట్టి... వ్యాక్సిన్ సమర్థత ఎక్కువ కాలం ఉంటుందని పరిశోధకులు విశ్వసిస్తున్నారు.
ఇదీ చూడండి:కరోనా వ్యాప్తి ఉద్ధృతం- మరో దేశంలో లాక్డౌన్
