కరోనా మహమ్మారి నుంచి బయటపడుతున్న చైనాలో మరో ఏడుగురు మృతి చెందారు. దీనితో మృతుల సంఖ్య 3 వేల 277కు చేరింది. తాజాగా మరో 78 కొత‌్త కేసులు నమోదయ్యాయి. ఇందులో 74మంది విదేశీయులున్నారు. దేశంలో కరోనా పాజిటివ్ కేసుల సంఖ్య 81వేల 171కి పెరిగింది. ఇప్పటివరకు 73 వేల 159 మంది కోలుకున్నారు. 4 వేల 735 మందికి చికిత్స అందిస్తున్నారు.
హుబేలో ప్రయాణ ఆంక్షలు ఎత్తివేత..
అయితే.. కరోనాకు కేంద్ర బిందువైనా చైనా హుబే రాష్ట్రంలో 2నెలల అనంతరం ప్రయాణ ఆంక్షలను ఎత్తివేయడానికి అధికారులు నిర్ణయించారు. కేసుల సంఖ్య తగ్గుముఖం పట్టినందువల్లే ఈ నిర్ణయం తీసుకున్నారు. మంగళవారం అర్ధరాత్రి నుంచి రాష్ట్రాన్ని వీడేందుకు అనుమతినిచ్చారు. తొలి కరోనా కేసు నమోదైన వుహాన్లో మాత్రం ఏప్రిల్ 8 వరకు ఆంక్షలు కొనసాగుతాయని పేర్కొన్నారు.
దక్షిణ కొరియాలో..
దక్షిణ కొరియాలో వైరస్ కేసుల సంఖ్య పెరిగింది. తాజాగా 76మందికి వైరస్ నిర్ధరణ అయ్యింది. దీనితో కేసుల సంఖ్య 9వేల 37కు చేరింది. సోమవారం 9మంది మరణించడం వల్ల మొత్తం మృతుల సంఖ్య 120కి చేరింది.
