కరోనా వైరస్కు అడ్డుకట్ట వేయడంలో చైనా విఫలమైందని ఆ దేశాధ్యక్షుడు జిన్పింగ్పై ప్రపంచ దేశాలు ఆరోపణలు చేశాయి. అయితే.. చైనా తీసుకున్న ఒక్క కీలక నిర్ణయంతో అనేక మంది ప్రాణాలు కాపాడినట్టు ఓ నివేదిక తెలిపింది. అదే 'వుహాన్ షట్డౌన్.'
వైరస్ కేంద్రబిందువైన వుహాన్ నగరాన్ని జనవరి 23న చైనా మూసివేసింది. దీని వల్ల వుహాన్ పరిసర ప్రాంతాలకు వైరస్ పాకడం మూడు రోజుల పాటు ఆలస్యమైందని ఆ నివేదిక పేర్కొంది. ఫలితంగా ఇతర ప్రాంతాల్లోని ప్రజలు స్పందించడానికి తగిన సమయం లభించిందని స్పష్టం చేసింది.
చైనా, అమెరికా, బ్రిటన్కు చెందిన 15 విశ్వవిద్యాలయాల్లోని 22 మంది శాస్త్రవేత్తలు చైనాలో పరిశోధనలు చేపట్టారు. వుహాన్ మూసివేత వల్ల సుమారు 2,02,000 కేసులు తగ్గాయని వెల్లడించారు. ఈ నివేదిక చైనా అధికారిక వార్తా పత్రిక 'చైనా డైలీ'లో ప్రచురితమైంది.
వుహాన్లో ప్రయాణాలపై నిషేధం వల్ల ఇతర నగరాలకు కొవిడ్-19 వ్యాప్తి సగటున 2.91 రోజులు ఆలస్యమైనట్టు నివేదిక పేర్కొంది. దీని ద్వారా సుమారు 130కిపైగా నగరాలు, చైనాలోని సగం భూభాగానికి లబ్ధి చేకూరినట్లు వివరించింది. ప్రయాణాలపై ఆంక్షలతో పాటు ఇతర చర్యలు వైరస్ వ్యాప్తిని తగ్గించేందుకు ఉపయోగపడినట్లు పరిశోధకులు గుర్తించారు.
2019 డిసెంబర్లో కరోనా వైరస్ పుట్టుకొచ్చింది. వైరస్ నేపథ్యంలో.. హుబే రాష్ట్రం, దాని రాజధాని వుహాన్పై కఠిన చర్యలు చేపట్టింది చైనా. సుమారు 5 కోట్ల మందిని నిర్బంధంలో ఉంచి వైద్యం అందిస్తోంది. వైరస్ వ్యాప్తిని అరికట్టేందుకు తీసుకున్న చర్యల్లో ప్రయాణ ఆంక్షలు, అనుమానిత, పాజిటివ్ కేసులను నిర్బంధించటం, పాఠశాలలు, వినోద రంగ వేదికల మూసివేత, సామూహిక కార్యక్రమాలపై నిషేధం, ప్రజలకు ఆరోగ్య పరీక్షలు నిర్వహించటం వంటి అంశాలు ఉన్నాయి. ఈ చర్యలను ప్రపంచ ఆరోగ్య సంస్థ అభినందించింది.
అయితే.. తొలి కేసు విషయంలో సందిగ్ధత నెలకొంది. డిసెంబర్లో తొలి కేసు నమోదైందని భావిస్తుంటే.. అంతకు ముందు నవంబర్ 17నే వైరస్కు సంబంధించిన ఓ కేసును గుర్తించినట్టు దక్షిణ చైనా మార్నింగ్ పోస్ట్లో మరో నివేదిక ప్రచురితమైంది.
2019, డిసెంబర్ 31 నాటికి 266 కేసులు నమోదయ్యాయి. 2020, జనవరి 1కి అవి 381కి చేరాయి.
28 రోజుల్లోనే 262 నగరాలకు..
అయితే.. జనవరి 11 నుంచి వుహాన్ను మూసివేసేంత వరకు సుమారు 4.3 మిలియన్ల మంది నగరం నుంచి ఇతర ప్రాంతాలకు పయనమైనట్టు తెలుస్తోంది. ఫలితంగా.. కేవలం 28 రోజుల వ్యవధిలోనే 262 నగరాలకు వ్యాప్తి చెంది, కొత్త కేసులు నమోదవడం ప్రారంభమయ్యాయని మరో పరిశోధన పేర్కొంది. 2009లో వచ్చిన హెచ్1ఎన్1 ఫ్లూ.. అవే నగరాలకు వ్యాపించేందుకు 132 రోజులు పట్టినట్లు గుర్తుచేసింది.
ప్రస్తుతం ఇలా...
వుహాన్లో వైరస్ వ్యాప్తి తగ్గుముఖం పట్టింది. శనివారం 13 కొత్త కేసులు మాత్రమే నమోదయ్యాయి. ఇప్పటివరకు మృతి చెందిన వారి సంఖ్య 3,189గా ఉంది. చైనాలో ఇప్పటి వరకు వైరస్ బారిన పడిన వారి సంఖ్య 80,824కు చేరినట్లు ఆ దేశా ఆరోగ్య శాఖ వెల్లడించింది.
ఇదీ చూడండి: లక్షణాలు తెలిసే లోపే వేగంగా కరోనా వ్యాప్తి
