కరోనా మహమ్మారి ఒకరి నుంచి ఒకరికి సోకేందుకు తీసుకుంటున్న సమయం.. వారంకన్నా తక్కువేనని పరిశోధకులు వెల్లడించారు. కరోనా వైరస్ సోకిన వ్యక్తికి లక్షణాలు బయటపడే లోపే సుమారు 10 శాతం మంది దాని ప్రభావానికి గురవుతున్నారని స్పష్టం చేశారు. వైరస్ను కట్టడి చేయడానికి ఈ పరిశోధన.. ఆరోగ్య అధికారులకు ఉపయోగపడుతుందని అభిప్రాయపడ్డారు.
వైరస్పై తాజా పరిశోధన.. 'ఎమర్జింగ్ ఇన్ఫెక్షియస్ డిసీజెస్' జర్నల్లో ప్రచురితమైంది. ఇద్దరు వ్యక్తుల్లో ఒకరి నుంచి ఒకరికి ఈ వైరస్ సోకినప్పుడు.. వారిలో లక్షణాలు బయటపడే సమయాన్ని లెక్కించారు పరిశోధకులు.
రెండు అంశాలు..
చైనాలో కరోనా వ్యాప్తికి పట్టే సమయం సగటున నాలుగు రోజులుగా తేల్చారు టెక్సాస్ విశ్వవిద్యాలయానికి చెందిన పరిశోధకులు. ఒక్కో కేసుతో ఎంత మంది ప్రభావితమవుతున్నారు, ఎక్కువ మందికి సోకేందుకు ఎంత సమయం పడుతుందనే రెండు అంశాల ఆధారంగా వైరస్ వ్యాప్తి వేగాన్ని కనిపెట్టినట్లు పేర్కొన్నారు.
కొవిడ్-19 వేగంగా వ్యాప్తి చెందుతోన్న కారణంగా దానిని అడ్డుకోవడం మరింత కష్టతరంగా మారిందని తెలిపారు నివేదిక సహ రచయిత లారెన్ అన్సెల్ మేయర్స్.
"ఎబోలా.. వ్యాప్తికి కొన్ని వారాలు పట్టింది. దానిని అరికట్టేందుకు ఆరోగ్య అధికారులకు సమయం దొరికింది. స్వైన్ ఫ్లూ మాదిరిగానే కరోనా వైరస్ వేగంగా వ్యాప్తి చెందుతోందని పరిశోధన సమాచారం చెబుతోంది. అందువల్ల మనం వేగంగా చర్యలు చేపట్టి.. పెరుగుతున్న ముప్పును అరికట్టాలి. ఈ ఆధారాలు నివారణ చర్యలు చేపట్టేందుకు ఉపయోగపడతాయి. ముఖ్యంగా నిర్బంధంలో ఉంచటం, పాఠశాలల మూసివేత, రవాణా ఆంక్షలు, సామూహిక కార్యక్రమాల రద్దు చర్యలు చేపట్టాలి. "
- లారెన్ అన్సెల్ మేయర్స్, నివేదిక సహ రచయిత
93 నగరాలపై పరిశోధన..
కరోనాకు కేంద్ర బిందువైన చైనాలో 93 నగరాలకు చెందిన 450 మంది వైరస్ బాధితులపై పరిశోధన చేశారు శాస్త్రవేత్తలు. వైరస్ లక్షణాలు బయటపడని వారు ఈ మహమ్మారి వ్యాప్తికి కారణమవుతున్నారని ఆధారాలను కనుక్కొన్నారు.
వైరస్ బారిన పడిన పది మందిలో ఒకరికన్నా ఎక్కువ మంది.. వ్యాధి సోకినట్లు గుర్తించలేకపోతున్నారని తెలిపారు.
ఇదీ చూడండి: జర జాగ్రత్త: దేశంలో విస్తరిస్తోన్న కరోనా వైరస్
