కరోనా వైరస్కు సంబంధించి అమెరికా చర్యలు భయాన్ని సృష్టిస్తున్నాయని చైనా ఆరోపించింది. చైనా యాత్రికులపై నిషేధం విధించటాన్ని ఆక్షేపించారు డ్రాగన్ విదేశాంగ శాఖ అధికార ప్రతినిధి హువా చున్యింగ్.
"కరోనా విషయంలో అమెరికా ఎలాంటి సాయం చేయలేదు. కానీ భయాన్ని మాత్రం పెంచుతోంది. "
- హువా చున్యింగ్, విదేశాంగ శాఖ అధికార ప్రతినిధి
అమెరికాలో 8 కరోనా కేసులను గుర్తించింది ఆ దేశం. ఈ నేపథ్యంలో ప్రజా ఆరోగ్య అత్యవసర స్థితిని శుక్రవారం ప్రకటించింది అగ్రరాజ్యం. అంతేకాకుండా చైనా నుంచి వచ్చే విదేశీయులపై తాత్కాలిక నిషేధం విధించింది. అమెరికన్లనూ 14 రోజల పర్యవేక్షణలో ఉంచుతోంది.
మాస్కుల కొరత
కరోనా వైరస్ను ఎదుర్కొనేందుకు మాస్కులు, ప్రత్యేక సూట్ల కొరత ఉందని హువా వెల్లడించారు. చైనాను కరోనా కలవరపెడుతున్న వేళ మాస్కుల కొరతతో ఆందోళన నెలకొంది. ఇప్పటికే చైనాలో 17 వేల కేసులను గుర్తించారు.
ఈ నేపథ్యంలో చైనాలోని 140 కోట్ల మందికి సరిపడా మాస్కులు లేవని.. అత్యవసరంగా వీటిని తెప్పించాలని భావిస్తున్నట్లు చెప్పారు హువా.
"మాస్కులు, ప్రత్యేక సూట్లు, కళ్లద్దాల కొరత ఉంది. అత్యవసరంగా వీటిని సమకూర్చుకోవాల్సిన అవసరం ఉంది. "
- హువా చున్యింగ్, విదేశాంగ శాఖ అధికార ప్రతినిధి
చైనాలో కర్మాగారాల ద్వారా రోజుకు 2 కోట్ల మాస్కులను తయారు చేయగలమని ఆమె చెప్పారు. దక్షిణ కొరియా, జపాన్, కజకిస్థాన్ నుంచి వైద్య పరికరాలు దిగుమతి చేసుకున్నామన్నారు. ఐరోపా, అమెరికా నుంచి మరిన్ని దిగుమతి చేయిస్తామన్నారు.
చైనాలో కరోనా ధాటికి 361 మంది మృత్యువాత పడ్డారు. 2002లో చైనాను వణికించిన సార్స్తో పోలిస్తే ఈ సంఖ్యతో పాటు ప్రభావం ఎక్కువని విశ్లేషకులు చెబుతున్నారు.
