కరోనా వైరస్ చైనాను వీడట్లేదు. చైనా జాతీయ ఆరోగ్య కమిషన్ (ఎన్హెచ్సీ) ప్రకారం.. దేశవ్యాప్తంగా శుక్రవారం 18 కొత్త కేసులు నమోదయ్యాయి. రెండు నెలలుగా చైనాలో అత్యంత సురక్షిత ప్రాంతంగా నిలిచిన రాజధాని బీజింగ్లో 6 కేసులు వెలుగులోకి వచ్చాయి.
బీజింగ్లో జింఫడి మార్కెట్లో మాంసం కొట్టే చెక్కపై కరోనా వైరస్ను గుర్తించారు అధికారులు. దీంతో ఆ ప్రాంతంలో తొమ్మిది మందిని నిర్బంధంలో ఉంచారు. జింఫడి మార్కెట్, జింగ్షెన్ సీఫుడ్ మార్కెట్లతో పాటు మరో నాలుగు ప్రధాన మార్కెట్లు కూడా మూతబడ్డాయి. వీటి ద్వారా కరోనా కేసులు పెరిగే అవకాశముందని అధికారులు వెల్లడించారు. ఈ ప్రాంతంలో కరోనా మరోసారి విజృంభించకుండా జాగ్రత్తలు తీసుకుంటున్నారు. దీంతో బీజింగ్లో పాఠశాలలు తెరవాలనుకున్న ఆలోచనను మానుకుంది అక్కడి ప్రభుత్వం.
శుక్రవారం నమోదైన 18 కేసుల్లో ఏడుగురికి కరోనా లక్షణాలు లేకుండానే వైరస్ బయటపడింది. దీంతో ఇలా లక్షణాలు లేకుండా కరోనా పాజిటివ్ తేలి క్వారంటైన్లో ఉన్నవారి సంఖ్య 98కి చేరింది.
ఇదీ చదవండి:తల్లికి కరోనా ఉన్నా బిడ్డకు పాలివ్వొచ్చు: డబ్ల్యూహెచ్ఓ
