'నేపాల్​ సరిహద్దు భూములను ఆక్రమించిన చైనా'

తమ దేశ సరిహద్దు భూములను చైనా ఆక్రమించుకుందని నేపాల్​ విపక్ష నేత జీవన్​ షాహి ఆరోపించారు. హుమ్ల జిల్లాలో ఈ ఆక్రమణ జరిగిందని.. ఫలితంగా అక్కడి ప్రజలు అనేక ఇబ్బందులు ఎదుర్కొంటున్నారని వెల్లడించారు. ఇంత జరుగుతున్నా.. చైనా ఆక్రమణ విషయాన్ని ప్రభుత్వం ఎందుకు అంగీకరించడం లేదని ప్రశ్నించారు.

నేపాల్​లోని హుమ్ల జిల్లాకు చెందిన భూములను చైనా ఆక్రమించుకుందని ఆ దేశ విపక్ష నేత జీవన్​ బహదూర్​ షాహి సంచలన వ్యాఖ్యలు చేశారు. చైనా ఆక్రమణతో అక్కడి ప్రజలు అనేక విధాలుగా సమస్యలు ఎదుర్కొంటున్నారని.. కనీసం ఆహార పదార్థాలను రవాణా చేసే లారీలను కూడా అనుమతించడం లేదని ఆరోపించారు.

జీవన్​.. కర్నాలి రాష్ట్రానికి చెందిన నేత. ఆయన సొంత జిల్లా హుమ్ల. చైనా ఆక్రమణను ప్రధాని కేపీ శర్మ ఓలి ఖండించినప్పటికీ.. ఇటీవలే హుమ్లలో పర్యటించిన జీవన్​.. క్షేత్రస్థాయిలో పరిస్థితులు భిన్నంగా ఉన్నాయని ఆవేదన వ్యక్తం చేశారు.

"ఇక్కడి ప్రజలు నరకం అనుభవిస్తున్నారు. ముఖ్యంగా సరిహద్దులోని ప్రజలు తీవ్రంగా సతమతమవుతున్నారు. హుమ్ల ప్రజలకు అందించాల్సిన ఆహార పదార్థాలతో కూడిన లారీలకు కూడా చైనా అనుమతినివ్వడం లేదు. ఈ విషయాన్ని ప్రభుత్వ దృష్టికి తీసుకెళ్లాం. నేపాల్​ భూములను ఆక్రమించుకోవడం సహా సరిహద్దు పిల్లర్​ నెం. 12ను దాటి వచ్చి నిర్మాణాలను చేపడుతోంది చైనా."

-- జీవన్​ బహదూర్​, నేపాల్​ విపక్ష నేత.

ఆయా ప్రాంతాల్లో వ్యవసాయం చేసేందుకు తమ ప్రజలు వెళ్లారని.. కానీ వారిని చైనా అధికారులు అక్కడి నుంచి తరిమికొట్టారని జీవన్​ పేర్కొన్నారు. నేపాల్​ సరిహద్దును చైనా ఆక్రమించుకుందని చెప్పడానికి సరిపడా ఆధారాలు ఉన్నప్పటికీ.. ప్రభుత్వం దీనిని ఎందుకు అంగీకరించడం లేదని ప్రశ్నించారు.

ఇదీ చూడండి:- చైనా సరిహద్దును కలుపుతూ నేపాల్ రోడ్డు నిర్మాణం