జైషే మహ్మద్ ఉగ్రసంస్థ అధినేత మసూద్ అజార్ను అంతర్జాతీయ ఉగ్రవాదిగా గుర్తించకుండా అడ్డుపడుతూ ముష్కరులను రక్షిస్తోందన్న అమెరికా ఆరోపణలపై స్పందించింది చైనా.
స్వదేశంలోని ముస్లింలను వేధిస్తున్న చైనా... మసూద్ను మాత్రం రక్షిస్తోందన్న విమర్శలపై పరోక్షంగా అమెరికాను ప్రశ్నించింది. తాము ఉగ్రవాదులకు ఆశ్రయం కల్పించట్లేదని బుకాయించింది.
"సాంకేతిక కారణాలతో చైనా ఉగ్రవాదులను రక్షిస్తోందని నిందిస్తున్నారు. అలాంటి కారణాలు చూపిన దేశాలన్నీ తీవ్రవాదులకు ఆశ్రయం కల్పించినట్లా? అలాగైతై ఏ దేశమైతే ఎక్కువ సాంకేతిక కారణాలు చూపుతుందో ఆ దేశమే ఉగ్రవాదులకు అతిపెద్ద ఆశ్రయం కల్పిస్తోందని మేము అనొచ్చా? "
-జెంగ్ షాంగ్, చైనా విదేశాంగశాఖ అధికార ప్రతినిధి.
మసూద్ను అంతర్జాతీయ ఉగ్రవాదిగా గుర్తించాలన్న భారత్ ప్రతిపాదనకు చైనా నాలుగుసార్లు అసమ్మతి తెలిపిందని అమెరికా విదేశాంగ మంత్రి మైక్ పాంపియో తెలిపారు. స్వదేశంలో 10 లక్షల మందికి పైగా ముస్లింలను దేశంలో వేధిస్తున్న చైనా... హింసాత్మక ఉగ్రవాద ముఠాలను మాత్రం ఐరాస ఆంక్షల నుంచి రక్షిస్తోందని ఆగ్రహం వ్యక్తం చేశారు.
