కుర్రకారుకు తలకట్టంటే విపరీతమైన మోజు. తమను మరింత అందంగా చూపించే తలకట్టు చేయించుకోవాలని, పాశ్చాత్య రీతులను అనుసరించడానికి వారు చేసే ప్రయత్నాలకు గమ్యస్థానం హెయిర్ సెలూన్లే మరి. అంత ప్రాముఖ్యమైన మార్పులకు నాంది పలికే సెలూన్లు పాశ్చాత్య స్టైల్స్ చేయలేం మొర్రో అని మొండికేస్తే ఎలా ఉంటుంది... బంగ్లాదేశ్లోని భువాపూర్లా ఉంటుంది.
బంగ్లాదేశ్ లోని భువాపూర్ బార్బర్ అసోసియేషన్ ఓ కీలక నిర్ణయం తీసుకుంది. తమవద్దకు తలకట్టు చేయించుకోవాలని వచ్చే కుర్రకారుకు పాశ్చాత్య స్టైల్స్ను చేయవద్దని తీర్మానించింది. ఎవరైనా తమ ఆదేశాలను ఉల్లంఘిస్తే 480 అమెరికన్ డాలర్ల జరిమానా విధిస్తామని హెచ్చరించింది.
కారణమేంటి...?
బంగ్లాదేశ్ యువకులు బాలీవుడ్, హాలీవుడ్ హీరోలు, అభిమాన క్రికెటర్లను అనుకరిస్తూ కటింగ్ చేయించుకుంటున్నారు. యువకుల తీరును చూసి ఓ పోలీసు అధికారికి చిర్రెత్తిపోయింది. యువత పెడదారి పడుతోందని భావించి భువాపూర్లోని తల్లిదండ్రులు, బార్బర్లతో సమావేశం ఏర్పాటుచేశారు. యువకులకు పాశ్చాత్య కటింగ్లు చెయ్యొద్దని వినతి చేశారు. అంగీకరించిన బార్బర్ల సమాఖ్య యువకులకు పాశ్చాత్య కటింగ్ చేయకూడదని నిర్ణయించింది. భువాపూర్ను అనుసరిస్తూ సమీపంలోని సఖీపుర్, బసియాల్ బార్బర్ సమాఖ్యలు ఇదే విధమైన తీర్మానాలు చేశాయి.
ఇదీ చూడండి:భారత్‌ భేరి: నాయకుడు లేని ఉద్యమం దారెటు?
