'ప్రపంచ శాంతే భారత్​, బంగ్లాదేశ్​ ఆకాంక్ష'

బంగ్లాదేశ్​ ఓరకండిలోని హరిచంద్​-గురుచంద్​ ఆలయంలో ప్రత్యేక పూజలు చేశారు ప్రధానమంత్రి నరేంద్ర మోదీ. అనంతరం మతువా వర్గం ప్రజలతో సమావేశమయ్యారు. భారత్, బంగ్లాదేశ్ ప్రపంచవ్యాప్తంగా శాంతి, ప్రేమ, స్థిరత్వాలను కోరుకుంటున్నాయని తెలిపారు.

భారత్​, బంగ్లాదేశ్​.. ప్రపంచవ్యాప్తంగా స్థిరత్వం, ప్రేమ, శాంతిని కోరుకుంటున్నాయని తెలిపారు ప్రధానమంత్రి నరేంద్ర మోదీ. బంగ్లాదేశ్​ పర్యటనలో భాగంగా రెండో రోజు మతువా వర్గం ఆధ్యాత్మిక గురువు హరిచంద్​ ఠాకూర్​ జన్మస్థలం ఓరకండిలోని హరిచంద్​-గురుచంద్​ ఆలయంలో ప్రత్యేక పూజలు చేశారు ప్రధాని. అనంతరం మతువా వర్గం వారితో సమావేశమయ్యారు.

"ఈ అవకాశం కోసం చాలా ఏళ్లుగా ఎదురుచూస్తున్నా. 2015లో బంగ్లాదేశ్​ వచ్చినప్పుడు ఓరకండికి రావాలనుకున్నా. అది ఇప్పుడు నిజమైంది. ఓరకండికి వచ్చిన తర్వాత.. భారత్​లోని మతువా ప్రజల పొందిన అనుభూతిని నేను అనుభవిస్తున్నా. ప్రపంచవ్యాప్తంగా ఉగ్రవాదం, అస్థిరత, ఆందోళనల స్థానంలో.. స్థిరత్వం, ప్రేమ, శాంతిని భారత్​, బంగ్లా చూడాలనుకుంటున్నాయి. తమ సొంత పురోగతితో ప్రపంచ పురోగతిని కోరుకుంటున్నాయి. "

- నరేంద్ర మోదీ, ప్రధానమంత్రి.

కరోనా మహమ్మారి సమయంలో భారత్​, బంగ్లాదేశ్​ తమ సామర్థ్యాలను నిరూపించుకున్నాయని తెలిపారు మోదీ. ప్రస్తుతం రెండు దేశాలు కలిసికట్టుగా కొవిడ్​పై పోరాటం చేస్తున్నట్లు చెప్పారు. భారత్​లో తయారైన వ్యాక్సిన్లు బంగ్లాదేశ్​ పౌరులకు అందించే పనిలో​ ఉన్నట్లు తెలిపారు.