ఉపఖండంలో విభేదాలకు చర్చలే పరిష్కారం: పాక్​ ప్రధాని​

శ్రీలంక పర్యటనలో ఉన్న పాకిస్థాన్​ ప్రధాని ఇమ్రాన్​ ఖాన్​.. తాను అధికారంలోకి వచ్చినప్పుడే భారత్​తో చర్చలు జరిపేందుకు ప్రయత్నించానని తెలిపారు. ఉపఖండంలో పేదరికాన్ని పారదోలడానికి వాణిజ్య సంబంధాలు మెరుగుపరచుకోవడమే మార్గమని వివరించారు.

రెండురోజుల పర్యటనలో భాగంగా శ్రీలంకలో పర్యటిస్తున్న పాక్​ ప్రధాని ఇమ్రాన్​ ఖాన్..​ భారత్​తో చర్చలు అవసరమని అభిప్రాయపడ్డారు. 2018లో తాను అధికారంలోకి వచ్చిన వెంటనే భారత్​తో చర్చలకు ప్రయత్నించినట్లు వివరించారు.

''నేను అధికారంలోకి వచ్చిన వెంటనే పొరుగున ఉన్న భారతదేశాన్ని సంప్రదించా. ఉపఖండంలోని విభేదాలను చర్చల ద్వారా పరిష్కరించుకోవచ్చని ప్రధాని నరేంద్ర మోదీకి వివరించా.''

-ఇమ్రాన్​ ఖాన్​, పాకిస్థాన్​ ప్రధాని

చర్చల విషయంలో తాను విజయవంతం కాలేదని ఇమ్రాన్​ వెల్లడించారు. అయితే ఎప్పటికైనా విజయం సాధిస్తాననే ఆశాభావంతో ఉన్నానని తెలిపారు.

కొలంబోకు వెళ్లేందుకు ఇమ్రాన్ ఖాన్ విమానానికి భారత వాయు మార్గాన్ని ఉపయోగించేందుకు కేంద్రం అనుమతించిన ఒకరోజు తర్వాత ఆయన ఈ వ్యాఖ్యలు చేయడం గమనార్హం.

వాణిజ్య సంబంధాలు..

కొలంబోలో జరిగిన శ్రీలంక-పాకిస్థాన్ పెట్టుబడుల సదస్సులో ప్రసంగించిన ఇమ్రాన్ ఖాన్.. వాణిజ్య సంబంధాలను మెరుగుపరుచుకోవడమే ఉపఖండంలో పేదరికాన్ని పరిష్కరించేందుకు ఏకైక మార్గమని అభిప్రాయపడ్డారు.

ఇదీ చదవండి: అమెరికాకు చైనా రాజీ సంకేతాలు!