చైనాకు చెందిన అలీబాబా, యాంట్ గ్రూప్ సహ వ్యవస్థాపకుడు జాక్ మా అజ్ఞాతం వీడారు. చైనా ప్రభుత్వాన్ని విమర్శించి వివాదాల్లో చిక్కుకున్న జాక్.. దాదాపు మూడు నెలల తర్వాత బహిరంగంగా కనిపించారు. ఈ మూడు నెలలు ఆయన కనిపించకుండా పోవడంపై అంతర్జాతీయంగా తీవ్ర చర్చ సాగింది.
ఎక్కడ కనిపించారు?
గ్రామీణ ఉపాధ్యాయుల కృషి, విజయాలను గుర్తించేందుకు ఏర్పాటు చేసిన ఓ ఆన్లైన్ కార్యక్రమంలో ఆయన పాల్గొన్నారు. ఈ కాన్ఫరెన్స్లో ఉపాధ్యాయుల కృషిని ప్రశంసించారు జాక్ మా. ప్రతి ఏటా ఈ కార్యక్రమం ప్రత్యక్షంగా జరగుతుండగా.. కొవిడ్ నేపథ్యంలో ఈ సారి ఆన్లైన్లో జరిగింది.
అసలు వివాదం ఏమిటంటే..
2020 అక్టోబర్‌ 24న చైనాలో జరిగిన ది బండ్‌ సమిట్‌లో జాక్‌మా ప్రసంగించారు. ఈ కార్యక్రమానికి చైనాకు చెందిన దిగ్గజ బ్యాంకర్లు కూడా హాజరయ్యారు. జాక్‌మా తన ప్రసంగంలో చైనా ఆర్థిక వ్యవస్థలోని లోపాలను ఉతికి ఆరేశారు. ఈ విషయమై జాక్ మాపై చైనా ప్రభుత్వం కన్నెర్రజేసింది. ఆయన సంస్థలపై నిఘా కూడా పెట్టింది. ఇదే కారణంతో జాక్ మాకు చెందిన యాంట్ గ్రూప్ ఐపీఓను అడ్డుకుంది. ఇందుకు చైనా అధ్యక్షుడు జిన్ పింగ్ స్వయంగా రంగంలోకి దిగినట్లు కూడా కథనాలు వెలువడ్డాయి. జాక్ మా కంపెనీలను జాతీయం చేసే యోచనలో కూడా చైనా ప్రభుత్వం ఉన్నట్లు ఇటీవల పలు వార్తలొచ్చాయి.
జాక్ మా ప్రసంగం తర్వాత దాదాపు మూడు నెలల నుంచి ఆయన అదృశ్యమయ్యారు. ఏ కార్యక్రమంలోనూ ఆయన కనిపించలేదు. జాక్ మాతో చైనా ప్రభుత్వం వివాదం తర్వాత.. వెంటవెంటనే ఈ పరిణామాలు చోటు చేసుకున్నాయి. దీనితో అంతర్జాతీయంగా కొన్నాళ్లుగా తీవ్ర చర్చ జరుగుతోంది. జాక్ మా ఆజ్ఞాతం వీడిన నేపథ్యంలో మిగతా విషయాలపైన కుడా ఏమైనా స్పష్టత వస్తుందేమో వేచి చూడాలి.
ఇవీ చూడండి:
