అంతర్యుద్ధం కారణంగా సిరియా అత్యంత దారుణమైన పరిస్థితిలో ఉంది. ఆ దేశాధ్యక్షుడు బషర్ అల్ అసద్కు వ్యతిరేకంగా 2011లో మొదలైన మృత్యుఘోష ఇంకా కొనసాగుతోంది. ఈ యుద్ధంలో ఇప్పటి వరకు 3,80,000 మంది మరణించినట్లు బ్రిటన్కు చెందిన సిరియా మానవహక్కుల పర్యవేక్షణ సంస్థ తెలిపింది. ఇంకా ఎన్నో నమ్మశక్యం కాని నిజాలను వెల్లడించింది.
మరణాలు
- ఇప్పటివరకు 3లక్షల 80వేల మంది మరణించారు.
- చనిపోయిన వారిలో 1,15,000 మంది పురుషులు, 22,000 మంది చిన్నారులు, 13,612 మంది మహిళలు ఉన్నారు.
దివ్యాంగులు
- యుద్ధంలో పలువురు గాయాలపాలవడం వల్ల సిరియాలో దివ్యాంగుల శాతం 30కి పెరిగింది.
- ఇది ప్రపంచ దివ్యాంగుల సగటుకు రెట్టింపు శాతం
స్థానభ్రంశం
- యుద్ధం కారణంగా ఆ దేశంలో లక్షల మంది స్థానచలనం చెందారు.
- దాదాపు 2.3 కోట్ల మంది తమ ఇళ్లను విడిచిపెట్టారు. రెండో ప్రపంచ యుద్ధం తర్వాత ఇదే అత్యధికం.
- 2020 ఫిబ్రవరి నాటికి సిరియా నుంచి 55 లక్షల మంది విదేశాలకు వలస వెళ్లారు.
- 60 లక్షల మంది సిరియాలోనే ఇతర ప్రాంతాలకు తరలివెళ్లారు.
ఆశ్రయాలు
- సిరియా నుంచి వచ్చిన 36 లక్షల మంది శరణార్థులకు టర్కీ ఆశ్రయం కల్పిస్తోంది.
- లెబనాన్ 15 లక్షల మంది సిరియన్లకు చోటు ఇచ్చింది.
- జోర్డాన్లో 6,50,000 మంది సిరియన్లు ఉన్నట్లు యూఎన్హెచ్సీఆర్ తెలిపింది. ప్రభుత్వం మాత్రం 13 లక్షల మంది ఉన్నట్లు చెబుతోంది.
- 3 లక్షల మంది సిరియన్లు ఇరాక్లో, లక్షా 30 వేల మంది ఈజిప్ట్లో ఆశ్రయం పొందుతున్నారు.
- వేలాది మంది సిరియన్లు ఐరోపాకు వలస వెళ్లారు. ఎక్కువగా జర్మనీలో ఆశ్రయం పొందుతున్నారు.
చిత్రహింసలు..
- యుద్ధం ప్రారంభమైనప్పటి నుంచి సిరియా అధ్యక్షుడు బషర్ అల్ అసద్ పాలనలో హింస, అత్యాచారం, మరణశిక్షలతో సహా మానవ హక్కుల ఉల్లంఘనలు జరుగుతున్నాయనే ఆరోపణలున్నాయి.
- 60 వేల మంది చిత్రహింసల కారణంగా మృతి చెందినట్లు తెలుస్తోంది.
- 5 లక్షల మంది జైళ్లలోనే మగ్గుతున్నారు.
- 2011-2015 మధ్యకాలంలో డమస్కస్ సమీపంలోని ఓ జైల్లో 13 వేల మందిని ఉరితీసినట్లు 2017లో 'అమ్నెస్టి ఇంటర్నేషనల్' తెలిపింది.
- అదే సమయంలో మరికొన్ని వేల మందిని జిహాదిస్టు గ్రూపులు నిర్వహించే జైళ్లలో ఉరితీసినట్లు అమ్నెస్టి పేర్కొంది.
ఆర్థికవ్యవస్థ పతనం..
- యుద్ధం కారణంగా సిరియాలో ఆర్థిక సంక్షోభం తలెత్తింది.
- నిరుద్యోగం, విద్యుత్ కొరత, గ్యాస్ కొరత ఏర్పడింది.
- 83 శాతం సిరియన్లు దారిద్ర్య రేఖకు దిగువన జీవిస్తున్నారు. 2011కు ముందు ఇది 28 శాతం మాత్రమే.
- చమురు, గ్యాస్ రంగాలకు దాదాపు 74 బిలియన్ డాలర్లు నష్టం వాటిల్లినట్లు అంచనా.
- 400 బిలియన్ డాలర్ల మేర ఆస్తి నష్టం, అనేక ప్రాంతాలు ధ్వంసం.
ప్రపంచ దేశాల్లో ప్రస్తుతం సిరియానే విపత్కర పరిస్థితిలో ఉన్నట్లు ఐక్యరాజ్యసమితి తెలిపింది.
